Ես ապրել եմ խորը ցավ, երբ իմացել եմ Շուշիի անկման մասին, վստահ եմ՝ Կոմանդոսը ևս մեծ ցավ է ապրել այդ ամենը լսելով և առհասարակ Արցախյան պատերազմի մասնակիցների համար սա մեծ հարված էր: Այս մասին yerkir.am-ին տրված հարցազրույցի ընթացքում ասաց ՀՀ և Արցախի նախկին պաշտպանության նախարար Սեյրան Օհանյանը:
«Ես խորը ցավ եմ ապրել, երբ իմացել եմ՝ Շուշին հանձնել են, մենք կորցրել ենք իմ ծննդավայրը և Կոմանդոսի ղեկավարման ընթացքում ազատագրած Շուշին:Կոմանդոսը խորը ցավ է ապրել և դա եղել է հարվածներից մեկը նրան և նրա առողջությանը, իսկ ինքը դեռ կարող էր ապրել և օգուտ տալ մեր ժողովրդին և, իհարկե, սա խորը հարված էր ամբողջ պատերազմի համատեքստում»,- ասաց Սեյրան Օհանյանը:
Նա նաև նշեց՝ Շուշիի աշխարհագրական դիրքը այնպիսին է, որ դժվար է գրավել:
«Մարտական կանոնադրության համաձայն՝ հրամանատարները պետք է ժամանակին ճիշտ գնահատեն իրադրությունը, Շուշիի պաշտպանությունը հեշտ է իրականացնել, և իր աշխարհագրական դիրքով նա բարձունքում է, բայց եթե հակառակորդը կարողանում է անցնել խորքերը և լայն գործողություններ իրականացնել, այդ դեպքում չափազանց դժվար է այդ պաշտպանությունը իրականացնել»,- նշեց նա:
Հայաստանի և Արցախի պաշտպանության նախկին նախարարը նաև նշեց՝ ստեղծված իրավիճակի համար կան մի քանի պատասխանատուներ, որոնք ժամանակին չեն իրականացրել իրենց պարտքը:
«Իրավիճակի համար պատասխանատու են մի քանի հոգի՝ ՀՀ և Արցախի Պաշտպանության նախարարները, Գլխավոր շտաբի պետը, Արտաքին գործերի նախարարը և Անվտանգության խորհրդի քարտուղարը, որոնց համակողմանի վերլուծության արդյունքում ճիշտ առաջարկություն պետք է անեին գերագույն հրամանատարին, որն էլ որոշումը կընդուներ»,-մեկնաբանեց նա:
Սեյրան Օհանյանը նաև ընգծեց՝ 30 տարիների ընթացքում Հայաստանը ունեցել է լուրջ ձեռքբերումներ, որոնք այսօրվա իշխանությունը կարողացել է ոչնչացնել:
«30 տարիների ընթացքում ՀՀ-ն լուրջ ձեռքբերումներ է ունեցել՝ պետականություն, ինքնիշխանություն, Արցախի ինքնորոշում և իր պատմական տարածքում ապրելու ցանկություն, բանակը, ռազմահայրենասիրական դաստիրակությունը, բանակցային լուրջ պաշարը եղել են մեր ձեռբերումները, նաև ունեցել ենք բազմաթիվ բացթողումներ, բայց այսօրվա իշխանությունները բոլոր արժեքները ոչնչացրել է, իսկ բոլոր թերությունները՝ բազմապատկել»,- ասաց Սեյրան Օհանյանը:
