Հակառակորդի դիպուկահար կրակոցից զոհված պայմանագրային զինծառայող Աշոտ Գևորգի Միքայելյանը 29 տարեկան էր, Ապրիլյան քառօրյա պատերազմի մասնակից: Ամուսնացած էր, ընտանիքի հետ ապրում էր Վանաձոր քաղաքում: Տեղեկությունը Sputnik Արմենիայի հետ զրույցում հայտնեց Վանաձորի քաղաքապետ Մամիկոն Ասլանյանը:
Sputnik Արմենիայի տեղեկություններով` Աշոտն ու կինը`Սյուզին, շուտով ծնողներ պետք է դառնային։
Աշոտ Միքայելյանն ավագ եղբայր ունի, որը նույնպես զինվորական է։
Հիշեցնենք, որ դեպքը տեղի է ունեցել հուլիսի 27-ին՝ ժամը 01:10-ի սահմաններում, ՀՀ հյուսիս–արևելյան ուղղությամբ տեղակայված զորամասերից մեկի մարտական դիրքում:
Դեպքի առթիվ ՀՀ ՔԿ զինվորական քննչական գլխավոր վարչության վեցերորդ կայազորային քննչական բաժնում ՀՀ քրեական օրենսգրքի 104-րդ հոդվածի (սպանություն) 2-րդ մասի 2-րդ և 13-րդ կետերով հարուցվել է քրեական գործ: Կատարվում է նախաքննություն:
Աղբյուրն՝ այստեղ
