ԱՄՆ Ֆլորիդա նահանգի բնակիչները, որոնք նկարահանել են շնաձկան մասնակցությամբ դաժան տեսանյութը, «դաժան զվարճանքին» մասնակցելու համար 10-օրյա ազատազրկման են դատապարտվել, գրում է Daily Mail-ը:
2017 թվականին Բրեյդենթոն քաղաքի 30-ամյա բնակիչ Ռոբերտ Բենակը հոլովակ է տեսանկարահանել, որտեղ երևում է, թե ինչպես է նավակն իր հետևից քարշ տալիս նավակին կապած շնաձկանը: Տեսանյութում լսվում է մի խումբ տղամարդկանց ծիծաղը: Տեսանյութն Instagram-ում հրապարակել է շնաձկներ որսացող Մարկ Քվարտինոն, որն արագ տարածվել է համացանցում:
Տեսանյութը վրդովմունք է առաջացրել ձկնորսների, կենդանիների պաշտպանների և նույնիսկ Ֆլորիդայի նահանգապետ Ռիք Սքոթի մոտ:
Քվարտինոյի խոսքով՝ նա հոլովակը տեղադրել է ձկնորսների դաժանությունը ցույց տալու համար:
Բենակը, ըստ աղբյուրի հաղորդման, ընդունել է իր մեղքը, ինչի արդյունքում դատարանը նրան 10 օր ազատազրկման է դատապարտել՝ կենդանիների նկատմամբ դաժան վերաբերմունքի մեղադրանքով:
Նրան նաև տուգանել են 2500 դոլարով և 250 ժամ հասարակական աշխատանքների դատապարտել կենդանիների ապաստարանում: Ամերիկացուն երեք տարով զրկել են ձկնորսական արտոնագրից:
Աղբյուրը հաղորդում է, որ նավակի 22-ամյա կապիտան Մայքլ Վենզելը նույնպես մասնակցել է այս տեսանյութի նկարահանմանը, ուստի նա նույնպես դատապարտվել է 10-օրյա ազատազրկման:
Տեսանյութի նկարահանումներին իր մասնակցությունն է ունեցել նաև 24-ամյա Սփենսեր Հայնցը, որը չի դատապարտվել՝ ապացույցների բացակայության պատճառով:
