Կառավարությունը երեկվա նիստում որոշում կայացրեց մինչև 4 տարվա արտադրության տրանսպորտային միջոցներ ներմու¬ծող կազմակերպություններին 2020 թվականի հունվարի 1-ից ազատել ավելացված արժեքի հարկից: Օրենքի գործողությունը նախատեսվում է տարածել մինչև 2020 թվականի դեկտեմբերի 31-ը կատարվող ներմուծումների նկատմամբ: Կառավարությունն այս նախագծով նպատակ ունի խթանել առավել ցածր արտանետումներ ունեցող, մինչև չորս տարվա արտադրության տրանսպորտային միջոցների ներմուծումը, ինչպես նաև մեղմել 2020 թվականի հուն¬վարի 1-ից ԵԱՏՄ տարածք տրանսպորտային միջոցների ներմուծման մաքսային դրույ¬քա¬չափերի՝ ՀՀ համար սահմանված արտոնյալ ժամկետի սպառ¬ման հետևանքով նոր դրույ¬քա¬չափերի կիրառության ազդեցությունը և նպաստել ոլորտում գոր¬ծու¬նեություն իրականացնող՝ ԱԱՀ վճարող կազմակերպությունների շրջա¬նառու միջոցների ավելացմանը:
Կառավարության այս որոշումը, սակայն, միանշանակ չի ընդունվում:
«Իրազեկ քաղաքացիների միավորում» ՀԿ նախագահ Դանիել Իոաննիսյանի խոսքերով՝ այս որոշումից ստացվում է, որ, փաստորեն, հունվարի 1-ից ԵԱՏՄ ընդհանուր (բաշխվող) բյուջեին քաղաքացիները պետք է ավելի շատ մուծեն մաքսատուրքի տեսքով, բայց դա կկոմպենսացվի Հայաստանի բյուջե մուտքագրվող հարկերի՝ ԱԱՀ-ի նվազեցմամբ: «Սա որևէ կերպ չի թեթևացնի այն մարդկանց կյանքը, ովքեր պարտքով-վարկով հազիվ մի 3-5 հազար դոլար են հավաքում մի հին մեքենա առնելու համար: Այդ մարդիկ հունվարի մեկից հետո չեն կարողանալու ավտո առնեն: Պետությունը պետք է լինի կանխատեսելի քաղաքացիների ու բիզնեսի համար: Չի կարելի մի տարով հարկային ռեժիմ սահմանել ու ասել, թե բա «մի տարուց տենանք»,- կարծում է Իոաննիսյանը:
Բացի դրանից, նրա խոսքերով՝ էլեկտրական շարժիչով մեքենաներն այլևս չեն ունենա հարկման ռեժիմի առավելություն, ինչը չեզոքացնում է էլեկտրամեքենաներ գնելու՝ կառավարության կողմից նախկինում ստեղծված լրացուցիչ մոտիվացիան՝ ԱԱՀ-ից ազատման տեսքով:
Ավտոներկրողների միության նախագահ Տիգրան Հովհաննիսյանն էլ համոզված է, որ այս որոշումը ոչ այլ ինչ է, քան այն, որ կառավարությունը կատարել է ավտոսալոնների պատվերը: Ավտոսալոնները արդեն տևական ժամանակ է՝ պայքարում են, որ անհատներին դուրս մղեն դաշտից:
Վերջին մեկ-երկու տարվա մեջ անհատների թիվը կտրուկ շատացել է, ովքեր մեքենաներ են ներկրում և դա հարուցել է սալոնների տերերի դժգոհությունը:
«Ինձ անձամբ ֆինանսների նախարարությունից են ասել, որ «Տոյոտա»-ի տնօրինությունը գալիս է նախարարություն ու պահանջում է անհատներին դուրս մղել դաշտից: Իսկ «Տոյոտան», հայտնի է, որ Քոչարյանինն է: Ստացվում է՝ մի կողմից Քոչարյանին դատում եմ, մյուս կողմից տուրք են տալիս իր ընկերության քմահաճույքներին ու բարենպաստ պայմաններ ստեղծում իրենց համար: Այս որոշմամբ կառավարությունը տուրք է տալիս, կատարում է ավտոսալոնների պատվերը: Այս որոշումը սալոնների համար էր, ոչ ավելի»,- «Առաջին լրատվական»-ի հետ զրույցում ասաց Հովհաննիսյանը:
Հովհաննիսյանի խոսքերով՝ ճիշտ է, այդ որոշումը կարող է նպաստել, որ շատ հին մեքենաներ չներկրվեն Հայաստան, բայց դա անհատներին զրկում է ավտոմեքենաներ ներկրելու հնարավորությունից: Մինչև 4 տարեկան մեքենաների գինը շատ բարձր է և անհատների համար ոչ հասանելի։
«Մենք դեմ ենք հին ավտոներին, մենք հասկանում ենք, որ Հայաստանը գերեզմանատուն չէ, բայց գոնե մինչև 10 տարեկան մեքենաներն ազատեր ԱԱՀ-ից, մենք չենք կարող 4 տարեկան ավտոներ բերենք ծախենք, դրանց գինը շատ բարձր է: Արդյունքում, անհատ ձեռներեցները չեն կարողանալու նոր մեքենաներ բերել և գործազուրկ են դառնալու: Էս 1-2 տարվա մեջ, այսպես թե այնպես, մեզ հաջողվում էր մի կտոր հացի փող վաստակել, մեր ընտանիքը պահել, բայց հիմա մեզ զրկում են նաև այդ հնարավորությունից»,- ընդգծեց Հովհաննիսյանը՝ ավելացնելով. «Վարչապետը տեղյակ չէ, որ ֆինանսների նախարարությունը ամեն օր հանդիպումներ է ունենում ավտոսալոնների տերերի հետ: Վարչապետը պետք է տեղյակ լինի, որ այս որոշումը պատվեր է չերեզ ֆինանսների նախարարություն: Ավտոսալոնների տերերը կերել են կառավարության որոշ ներկայացուցիչների ուղեղները: Վարչապետը պետք է պարզի, թե իր թիկունքում ինչ է կատարվել: Թող պարզի, թե Քոչարյանի «Տոյոտան» ինչպես է ֆինանսների նախարարության հետ գաղտնի բանակցությունների մեջ մտել ու հասել իր համար ցանկալի արդյունքի՝ որոշման: Հասկանում եք, չեն կարող հարուստները ազատվել հարկերից ու գերշահույթներ ստանան: Սա աբսուրդ է, ոչ տրամաբանական որոշում»:
Տիգրան Հովհաննիսյանը տեղեկացրեց, որ կառավարության այս որոշումը հարուցել է ավտոներկրող անհատների դժգոհությունը, և իրենք սեպտեմբերի 11-ին՝ ժամը 14-ին, կառավարության շենքի դիմաց բողոքի ակցիա են իրականացնելու և պահանջելու են, որպեսզի ԱԱՀ-ից ազատվեն ոչ թե 4, այլ 7-10 տարեկան ավտոների ներկրումը:
