Որպես հայ մարդ՝ ինձ համար շատ վիրավորական է, որ Հայաստանը չունենա Մշակույթի նախարարություն: Tert.am-ի հետ զրույցում, անդրադառնալով մշակույթի նախարարության լուծարման թեմային, ասաց մշակույթի վաստակավոր գործիչ Գագիկ Գինոսյանը:
«Եթե մենք հասկանում ենք, որ Մշակույթի նախարարությունն ուռճացված ապարատ է, 130 հոգի են աշխատում, ապա կրճատեք և դարձրեք 30, բայց թողեք նախարարություն, և այն մարդը, որը պատասխանատու է այդ գերատեսչության համար, ներկայանալիս ներկայանա որպես նախարար, որ հասկանան էդ մարդու կարգավիճակը, այլ ոչ թե լինի չգիտեմ ինչ վարչության, չգիտեմ ինչ պաշտոնյա: Եթե այդ մարդը պետք է 5 րոպե ներկայացնի, թե ինքը ով է, որ այսինչ ընդհանուր նախարարության Մշակույթի բաժնի պատասխանատուն է, դժվար թե նրան լուրջ ընդունեն»,- ասաց Գինոսյանը:
Հարցին՝ նախարարության պահպանման պարագայում ո՞վ պետք է լինի նախարարը՝ ա՞յն մարդն, ում մեջ է մշակույթը, թե՞ մշակութային գործիչ, Գինոսյանը պատասխանեց՝ երկուսը միասին. «Մշակութային գործիչը, որը վատ կառավարիչ է և կառավարման մշակույթին չի տիրապետում, ունենալով բարձր ճաշակ, կարող է տապալել մշակույթը: Նույնը և հակառակը՝ լավ կառավարիչը, եթե չի հասկանում՝ ինչ է մշակույթը, ապա նույնպես կտապալի: Մշակույթի նախարարը պետք է լինի մարդ, որը տիրապետում է մշակութային ամբողջ դաշտը և ունի կառավարման ձիրք»:
Գագիկ Գինոսյանն ասում է՝ եթե չկան հստակ ուղենիշներ՝ ինչ ճանապարհով պետք է ընթանա մշակույթը, եթե չկա հստակ ռազմավարություն և տեսլական, ապա չի կարելի նման ռադիկալ որոշումներ կայացնել. «Մենք չգիտենք, չենք էլ պատկերացնում՝ մեր մշակույթն ուր է գնում, մենք չենք հայտարարում՝ ինչ է պետք մեր երկրին և քայլեր ենք անում»:
Մանրամասները՝ տեսանյութում:
Աղբյուրը` https://www.tert.am/am/news/2019/04/06/ginosyan/2966841