Երեւան քաղաքի ընդհանուր իրավասության դատարանի Շենգավիթի նստավայրում՝ դատավոր Աննա Դանիբեկյանի նախագահությամբ, շարունակվում է Սերժ Սարգսյանի եղբորորդու՝ Հայկ Ալեքսանդրի Սարգսյանի գործով դատավարությունը:
Այսօր առաջին անգամ դատարան է ներկայացել Հայկ Սարգսյանի դեմ ցուցմունք տված նրա նախկին մտերիմ ընկեր «Կենտրոնի Կյաժ» մականունով հայտնի Դավիթ Սիմոնյանը: Նա դատարան էր ներկայացել ոստիկանության 6-րդ վարչության աշխատակիցների ուղեկցությամբ: Նշենք, որ արդեն մի քանի ամիս է՝ Սիմոնյանը շրջում է ոստիկանների ուղեկցությամբ: Դատարանում այսօր հայտնի դարձավ, որ ոստիկանության աշխատակիցները ապահովում են նաեւ նրա ընտանիքի անվտանգությունը:
Նախագահող դատավոր Աննա Դանիբեկյանը ոստիկանության աշխատակիցներից հետաքրքրվեց, թե ինչու են նրանք գտնվում նիստերի դահլիճում, տուժողի կողքին: Ի պատասխան՝ 6-րդ վարչության աշխատակիցն ասաց՝ Դավիթի անվտանգության համար:
Մեղադրող դատախազ Աբգար Առաքելյանն ասաց, որ այս գործով տուժողի նկատմամբ անվտանգության միջոց կիրառված չէ, եւ ինքը տեղյակ չէ, թե ինչու են նրան ուղեկցում ոստիկանները: Թե ինչ գործով է նրա նկատմամբ պաշտպանության միջոց կիրառվել՝ հայտնի չէ:
Դատավոր Աննա Դանիբեկյանը ոստիկաններից խնդրեց տուժողից մի փոքր հեռու նստել:
Հայկ Սարգսյանի պաշտպան Երեմ Սարգսյանը հայտարարեց, որ դատարան չի ներկայացվել որեւէ ապացույց նրանց՝ ոստիկանության աշխատակից լինելու վերաբերյալ: «Պարզ չէ, թե ինչ անվտանգություն են ապահովում եւ ումից»,- ասաց Սարգսյանը:
Դատարանի որոշմամբ՝ ոստիկանները տեղափոխվեցին ապակիների այն կողմում գտնվող՝ ներկաների համար նախատեսված հատված:
Նախորդ դատական նիստում դատարանը քննարկել է պաշտպանական կողմի միջնորդությունը՝ դեպքի պահին տուժողի հագին եղած հագուստները որպես իրեղեն ապացույց ճանաչելու եւ գործին կցելու վերաբերյալ, որի լուծումը հետաձգվել էր մինչեւ միջնորդության լուծման համար էական հանգամանքների պարզումը հաշվի առնելով. մեղադրողը հայտնել էր, որ նշված հագուստները վերացված են: Դատարանը նշվածի վերաբերյալ մեղադրող դատախազ Աբգար Առաքելյանից համապատասխան տեղեկություններ էր պահանջել: Այսօր արդեն մեղադրող դատախազը ներկայացրեց իրենց կողմից կատարված հարցումը եւ քննչական բաժնից ստացված գրության բնօրինակն այն մասին, որ տուժողի հագուստները չեն պահպանվել:
Այնուհետեւ նախագահող դատավոր Աննա Դանիբեկյանը ամբաստանյալ Հայկ Սարգսյանին տեղեկացրեց, որ իրեն առաջադրված մեղադրանքը համարվում է միջին ծանրության հանցագործություն, որի համար քրեական պատասխանատվության ենթարկելու վաղեմության ժամկետը 5 տարի է: Նշենք, որ խոսքը Հայկ Սարգսյանին առաջադրված ապօրինի կերպով զենք-զինամթերք ձեռք բերելու մեղադրանքին է վերաբերում: Դատավորը նշեց, որ ըստ մեղադրական եզրակացության՝ Հայկ Սարգսյանի կողմից ենթադրյալ արարքը կատարվել է 2007 թվականի ապրիլի 1-ին եւ պարզաբանեց, որ վաղեմության ժամկետները լրանալը համարվում է քերական հետապնդումը դադարեցնելու հիմք՝ բայց ոչ արդարացնող: Դատավորն ասաց, որ վաղեմության հիմքով քրեական հետապնդումը դադարեցնելու համար անհրաժեշտ է ամբաստանյալի համաձայնությունը, եթե նա չհամաձայնի, ապա քրեական գործի վարույթը կշարունակվի: Հայկ Սարգսյանը, սակայն, նշեց, որ համաձայն չէ, որպեսզի իր նկատմամբ քրեական հետապնդումը դադարեցվի վաղեմության հիմքով:
Նրա պաշտպան Երեմ Սարգսյանն էլ ասաց, որ քրեական գործ չի կարող հարուցվել, անձին որպես մեղադրյալ ներգրավվելու որոշում չի կարող կայացվել, եթե առկա է վաղեմության հիմք: Այնինչ, իր պաշտպանյալին անհիմն մեղադրանք է առաջադրվել այն դեպքում, երբ վաղեմության ժամկետը լրացած է եղել։ նա նշեց, որ նախաքննության ընթացքում իր պաշտպանյալի դիրքորոշումը չեն էլ հարցրել՝ նա առարկում է, թե՝ ոչ:
Մեղադրող դատախազ Աբգար Առաքելյանն էլ հակադարձեց՝ ասելով, որ որեւէ անօրինականություն տեղի չի ունեցել, առաջադրված մեղադրանքը հիմնավոր է: Դատախազն ասաց, որ երբ Հայկ Սարգսյանը կասկածյալի կարգավիճակում էր, հրաժարվում էր պատասխանել իրավապահների հարցերին, ուստի, վաղեմության ժամկետի լրանալու հետ կապված եւս կարծիք չի հայտնել։
Դատարանն անցավ դատաքննության փուլին: Մեղադրող դատախազ Աբգար Առաքելյանը հրապարակեց մեղադրական եզրակացության համառոտ բովանդակությանը: Ըստ այդմ՝ Հայկ Սարգսյանին մեղադրանք է առաջադրվել այն բանի համար, որ նա 2007 թվականի ապրիլի 1-ին`ժամը 16:00-ի սահմաններում, իր բնակության վայրի` Երեւան քաղաքի Թումանյան փողոցի 11 շենքի 14 բնակարանի նկուղային հարկում գտնվող սենյակում, քննությամբ չպարզված հանգամանքներում ապօրինի ձեռք բերած և պահվող, հրազեն հանդիսացող «SIGSAUER» տեսակի «P266» մոդելի ատրճանակով Դավիթ Աշոտի Սիմոնյանին ապօրինաբար կյանքից զրկելու դիտավորությամբ կրակել է վերջինիս որովայնին, սակայն հանցագործությունն ավարտին չի հասցրել՝ իր կամքից անկախ հանգամանքներում:
Հայկ Սարգսյանը, սակայն, դիրքորոշում չհայտնեց իրեն առաջադրված մեղադրանքի վերաբերյալ։ Նա խնդրեց դատարանին պարզաբանել, թե ըստ մեղադրանքի՝ մարմնի ո՞ր մասին է կրակվել. «Խնդրում եմ պարզաբանել՝ ըստ մեղադրանքի՝ որովայնը մարմնի ո՞ր մասն ա»,- դատարանից հետաքրքրվեց Հայկ Սարգսյանը։ Դատավորը պարզաբանեց, որ որովայնը մարմնի՝ կրծքավանդակից ներքեւ գտնվող հատվածն է։ Մեղադրող դատախազ Աբգար Առաքելյանն էլ ասաց, որ մեղադրանքի էությունը հասկանալի է:
Հայկ Սարգսյանի պաշտպան Երեմ Սարգսյանի խոսքով, սակայն, մեղադրանքը վերացական է եւ հասկանալի չէ, թե մարմնի կոնկրետ ո՞ր հատվածին է վնասվածքը հասցվել, որպեսզի պաշտպանական կողմը կարողանա պաշտպանվել: Այսօրվա դատական նիստին դատարանը սահմանեց ապացույցների հետազոտման կարգը. նախ կհարցաքննեն տուժող Դավիթ Սիմոնյանին, հետո գործով վկաներին, ապա կհետազոտվեն գործում առկա ապացույցները, իսկ վերջում կլսեն ամբաստանյալին։
Նշենք, որ նիստերի դահլիճում էին գտնվում Հայկ Սարգսյանի հարազատները, մտերիմներն ու ընկերները. նիստերի դահլիճում էր նաեւ ՀԱՊԿ նախկին գլխավոր քարտուղար Յուրի Խաչատուրովի որդին՝ Իգոր Խաչատուրովը: Վերջինս լրագրողների հետ զրույցում ասաց, որ Հայկ Սարգսյանը իր մանկության ընկերն է:
Սույն գործով հաջորդ դատական նիստը տեղի կունենա հունվարի 16-ին:
Աղբյուրը՝ armtimes.com
