Ինչպես տեղեկացրել ենք, արդեն հայտնի են Ֆուտբոլի Ֆեդերացիայի նախագահի թեկնածուների վերջնական պատկերը. ըստ այդմ՝ այս պաշտոնին են հավակնում Խորեն Հովհաննիսյանը, Թովմաս Գրիգորյանը և Արմեն Մելիքբեկյանը: Սպասվող ընտրությունների, ակնկալիքների և այլնի մասին զրուցել ենք ՀՖՖ գործկոմի անդամ Մարինա Թաշչյանի հետ:
-Տիկին Թաշչյան, որքանո՞վ եք հետևում այս գործընթացին, թեկնածուների վերջնական պատկերն արդեն պարզ է, ըստ Ձեզ՝ ինչպիսի՞ մրցակցություն է սպասվում:
-Հետևում եմ բոլոր իրադարձություններին, գիտեմ, որ 4 թեկնածու ունենք այս պահի դրությամբ: Երեքին ճանաչում եմ, բայց, ճիշտն ասած, Արսեն Աղաջանյանի մասին չէի լսել, չնայած, որ ամբողջ կյանքս ֆուտբոլում եմ անցկացրել:
–Ու՞մ եք տեսնում այս պաշտոնում, ըստ Ձեզ ի՞նչ որակներ պետք է ունենա այն մարդն, ում ուսերին է դրվելու մի պաշտոն, որը քննարկվում է ոչ միայն սպորտասերների կողմից, այլև ողջ հանրության:
-Ըստ իս՝ ամենաարժանի թեկնածուն Թովմաս Գրիգորյանն է. նրան երկար տարիներ է, ինչ ճանաչում եմ: Գիտեմ, որ տեղյակ է ֆուտբոլային բոլոր փոփոխությունների մասին, իսկ ֆուտբոլն աճող սպորտաձև է ՝ ամեն օր նոր օրենքներ, նոր մոտեցումներ: Բացի այդ, Գրիգորյանը երկար տարիներ եղել է գործադիր կոմիտեի անդամ, ղեկավարել է ֆուտբոլային ակումբ, տարբեր հիմնարկություններ, ունի ղեկավարի ջիղ, լավ է հասկանում ֆուտբոլից և իհարկե ճանաչված է ֆուտբոլային ընտանիքում:
Շատ լավ ճանաչում եմ նաև Խորեն Հովհաննիսյանին, նա մեր լեգենդ ֆուտբոլիստներից է եղել, բայց այսօր վստահ չեմ, որ Խորենը կկարողանա կառավարել Ֆեդերացիան:
–Թեկնածուների ներկայացրած ծրագրերում ի՞նչ շեշտադրումներ պետք է լինեն, որ վստահ լինենք՝ ֆուտբոլն այս անգամ վստահելի ձեռքերում է:
-Պետք է հիմքից սկսել, այսինքն՝ մանկապատնեկան ֆուտբոլից: Եթե մենք չզարգացնենք մանեկապատանեկան ֆուտբոլը, չենք ունենա թիմեր, հավաքականներ: Շենք կառուցելիս էլ առաջինը հիմքն է դրվում՝ ֆունդամենտը, նոր պատերն են շարում: Մեր մանկապատանեկան ֆուտբոլն ու մասսայական ֆուտբոլը ֆունդամենտն են, պատերը՝ ակումբներն են, տանիքը՝ հավաքական թիմերը:
-Կխնդրեմ նշեք 3 հիմնական բաց, որոնք Ֆեդերացիայի նորընտիր նախագահը պետք է առաջնայինը լուծի:
-Առաջին հերթին պետք է լավ մասնագետներ ունենանք մանկապատանեկան ֆուտբոլում, որոնք կսովորեցնեն այս սպորտաձևի առաջին տառերը: Երկրորդը՝ լավ մասնագետներ՝ հավաքական թիմերում, իսկ լավագույններից լավագույնն՝ Ազգային հավաքականում: Բացերն առհասարակ շատ են՝ պետք է սկսենք ֆուտբոլը զարգացնել բոլոր մարզերում, արդյունքում լայն ընտրութուն կունենանք, լավ երեխաների կբերենք հավաքական: Այսօր, ցավոք, չունենք այդ ընտրություն ու ժամանակ առ ժամանակ ստիպված ենք լինում լավ ֆուտբոլիստներ գտնել արտասահմանյան երկրներից:
-Եվ վերջում, տիկին Թաշչյան, ի՞նչ ակնկալիքներ ունենք այս ընտրություններից:
Շատ եմ ցանկանում, որ լինեն արդար ընտրություններ և որ քաղաքականությունը չխառնվի ֆուտբոլին. ֆուտբոլային մարդիկ իսկապես կարողանան ֆուտբոլը ոտքի կանգնեցնել: Իմ ամբողջ ընտանիքը ֆուտբոլային է՝ամուսինս, երեխաներս, ես. մենք մեր ամբողջ կյանքը ֆուտբոլին ենք նվիրել. անասելի մեծ ցանկություն ունեմ, որ ֆուտբոլը ծաղկի և ունենանք լավագույն արդյունքները:
