Թուրինի «Յուվենտուսի» հարձակվող Կրիշտիանու Ռոնալդուն ճանաչվել է Իտալիայի առաջնության նախորդ մրցաշրջանի լավագույն ֆուտբոլիստ: Այս մասին հայտնում է թուրինյան թիմի պաշտոնական կայքը:
Մրցանակը պորտուգալացուն է հանձնվել Gran Galà del Calcio-2019 մրցանակաբաշխության ժամանակ: Նախորդ մրցաշրջանում Ռոնալդուն մասնակցել է 31 հանդիպման` դառնալով 21 գոլի և 8 գոլային փոխանցման հեղինակ:
Նախորդ մրցաշրջանի լավագույն ակումբ է ճանաչվել «Ատալանտան», իսկ թիմի գլխավոր մարզիչ Ջան Պիեռո Գասպերինին էլ ստացել է լավագույն մարզչի մրցանակը:
Հիշեցնենք, որ պորտուգալացին ներկա չէր Փարիզում կայացած «Ոսկե գնդակի» մրցանակաբաշխությանը, որտեղ France Football-ի վարկածով 2019 թվականի լավագույն ֆուտբոլիստ ճանաչվեց «Բարսելոնայի» և Արգենտինայի հավաքականի հարձակվող Լիոնել Մեսսին։ Քվեարկության արդյունքներով Ռոնալդուն միայն երրորդն էր:
