Մինչև այժմ ներարկված պատվաստանյութերի 128 միլիոն դեղաչափի ¾-ը հասել է ընդամենը 10 երկրի, որոնց բաժին է ընկնում համաշխարհային ՀՆԱ-ի 60 %-ը։ Այս պահին գրեթե 130 երկիր՝ 2,5 միլիարդ բնակչությամբ, մնացել է առանց պատվաստանյութի։ Այս մասին ասվում է ՅՈՒՆԻՍԵՖ-ի գործադիր տնօրեն Հենրիետա Ֆորի և Առողջապահության համաշխարհային կազմակերպության գլխավոր տնօրեն Թեդրոս Գեբրեյեսուսի համատեղ հայտարարությունում։
«Այս կործանարար ռազմավարությունը կյանքեր կխլի, վիրուսին մուտացվելու և պատվաստանյութերին դիմակայելու հետագա հնարավորություն կտա և կխոչըդոտի համաշխարհային տնտեսության վերականգնմանը»,-գրված է հայտարարությունում։
ՅՈՒՆԻՍԵՖ-ը և ԱՀԿ-ն երկրների ղեկավարներին կոչ են արել նայել իրենց երկրի սահմաններից դուրս և պատվաստումների այնպիսի ռազմավարություն որդեգրել, որն իսկապես կարող է վերջ դնել համավարակին և սահմանափակել դրա նոր տարբերակները։
Փաստաթղթում նաև կոչ է արվում բուժաշխատողներին և բարձր ռիսկի գոտում գտնվող բնակչությանը պատվաստելուց հետո պատվաստանյութը կիսել այլ երկրների հետ՝ COVAX ծրագրի շրջանակներում։
