Թուրքիայի արտգործնախարարությունն արձագանքել է հայ-ադրբեջանական սահմանային բախումներին։ Անկարան դատապարտել է հայկական կողմի գործողությունները՝ դրանք որակելով «ագրեսիվ ազգայնական մոտեցումների նոր դրսևորում»։
Հայտարարության մեջ մասնավորապես նշվում է, թե «Հայաստանը ցանկանում է միջազգային հանրության ուշադրությունը շեղել տարիներ շարունակ Ադրբեջանի տարածք համարվող Լեռնային Ղարաբաղի և հարակից շրջանների ապօրինի օկուպացիայից և հակամարտությանը նոր մասշտաբ տալով արգելակել հիմնախնդրի քաղաքական լուծումը»։
«Հայկական կողմը պետք է հրաժարվի նմանօրինակ վտանգավոր մարտավարությունից և ընտրի ողջամտության և իրավական ճանապարհը։ Սեփական կարողությունները գերազանցող նպատակների համար արկածախնդրության դիմելը ի ցույց է դնում Հայաստանի՝ դատողություն անելու անկարողությունը և հանդիսանում է ամենամեծ խոչընդոտը մեր տարածաշրջանում խաղաղության և կայունության համար», – ասված է հայտարարությունում:
Թուրքիայի արտաքին գերատեսչությունը հույս է հայտնել, թե միջազգային հանրությունը անընդունելի կհամարի «սեփական ագրեսիան կոծկելու Հայաստանի ջանքերը»:
«Թուրքիան շարունակելու է իր ողջ կարողությամբ լինել Ադրբեջանի կողքին տարածքային ամբողջականության պահպանման համար պայքարում», – ասված է Թուրքիայի ԱԳՆ-ի հայտարարության մեջ։
Իրավիճակը Հայաստանի և Ադրբեջանի սահմանի Տավուշի հատվածում կտրուկ սրվել է երեկ կեսօրից հետո, երբ ադրբեջանական զինուժի զինծառայողները ՈւԱԶ-ով պետական սահմանը խախտելու փորձ են կատարել: Կողմերը հրետանային կրակ են կիրառում, Ադրբեջանն արդեն հայտնել է իր 4 զինծառայողների զոհվելու, ևս առնվազն 4-ի վիրավորվելու մասին: Հայկական կողմից, ըստ պաշտոնական հաղորդագրությունների, զոհվածներ չկան, թեթև մարմնական վնասվածքներ են ստացել սահմանին ծառայություն իրականացնող երկու ոստիկաններ:
Աղբյուրը՝ azatutyun.am
