ԱՄՆ Տեխաս նահանգից սենատոր Թեդ Քրուզը հայտարարել է, որ եթե ռուսական «Գազպրոմ» ընկերությունն ավարտին հասցնի «Հյուսիսային հոսք-2» գազատարի կառուցման աշխատանքները, ապա ամերիկյան կողմի՝ դեռ դեկտեմբերին ընդունած պատժամիջոցներին կենթարկվի, գրում է lenta.ru կայքը։
Նրա խոսքով՝ ԱՄՆ կառավարությունը հավանություն է տվել «Հյուսիսային հոսք-2»-ի վերաբերյալ պատժամիջոցներին։
«Եթե «Գազպրոմը» շինարարության ավարտի համար «Ակադեմիկոս Չերսկիյ» նավն օգտագործի, ապա ԱՄՆ նախագահը ստիպված կլինի պատժամիջոցներ կիրառել»,- ընդգծել է Քրուզը։
Դեկտեմբերին պատժամիջոցների սահմանումից անմիջապես հետո շվեյցարական Allseas կապալառու ընկերությունը հրաժարվել էր շարունակել աշխատանքը, որին ի պատասխան Ռուսաստանի իշխանությունները բազմիցս հայտարարել էին, որ ի վիճակի են ինքնուրույն ավարտին հասցնել գազատարի կառուցման աշխատաքները:
«Հյուսիսային հոսք-2»-ի շինարարությանը նպաստող ընկերությունների նկատմամբ պատժամիջոցները ենթադրում են դրանց բաժնետերերի և պաշտոնյաների ԱՄՆ մուտքի արգելք, ինչպես նաև ամերիկյան ընկերությունների կողմից վերահսկվող ցանկացած սեփականության և ռեսուրսի հասանելիության արգելափակում։
