Առևտրի համաշխարհային կազմակերպության (ԱՀԿ) վերաքննիչ մարմինն ԱՄՆ գործողությունների պատճառով առաջիկա օրերին ստիպված կլինի դադարեցնել իր գործունեությունը: Դրանից հետո «համաշխարհային առևտրի կանոնները դե ֆակտո կդադարեն գործել», գրում է գերմանական Der Spiegel պարբերականը:
Նշվում է, որ ԱՀԿ վերաքննիչ մարմնում յոթ տեղ կա, սակայն դրա գործունեության համար անհրաժեշտ է ամենաքիչը 3 անդամի առկայություն:
Այժմ մարմինը երեք ներկայացուցիչ ունի, սակայն դեկտեմբերի 10-ին լրանում է նրանցից երկուսի լիազորությունների երկրորդ և վերջին ժամկետը:
Հոկտեմբերի սկզբին առևտրի հարցերով եվրահանձնակատար Սեսիլյա Մալմստրյոմը հայտարարել էր, որ առկա է դեկտեմբերի կեսին ԱՀԿ-ի վերաքննիչ մարմնի գործունեության դադարեցման հնարավորություն: Այս կանխատեսումը պայմանավորված է նրանով, որ վերջին երկու տարիների ընթացքում Վաշինգտոնն արգելափակում է ԱՀԿ վերաքննիչ մարմնի նոր անդամների ընտրության գործընթացը:
Հենց այս մարմինը դադարեցնի գործունեությունը, «ԱՀԿ ամբողջ համակարգը կփլուզվի», ինչն էլ կհանգեցնի համաշխարհային առևտրի կանոնների գործողության դադարեցմանը:
Հոդվածի հեղինակի համաձայն` Բրյուսելում ենթադրում են, որ Թրամփը փորձում է հասնել դրան, քանի որ «առանց ԱՀԿ-ի՝ աշխարհում ավելի բարենպաստ պայմաններ կլինեն ԱՄՆ-ի համար»:
