Հյուսիսային Կորեայի միջուկային ծրագրի հարցով ԱՄՆ-ի հետ բանակցությունների համար պատասխանտու հյուսիսկորեացի բարձրաստիճան պաշտոնյաններից մեկը, որը, հարավկորեական և արևմտյան լրատվամիջոցների փոխանցմամբ, հարկադիր աշխատանքների էր ուղարկվել այս տարվա փետրվարին Հանոյում ԱՄՆ նախագահ Դոնալդ Թրամփի հետ բանակցությունների ձախողումից հետո, իր «աքսորի» վերաբերյալ լուրերի ֆոնին հանրությանն է ներկայացել երկրի ղեկավար Կիմ Չեն Ընի հետ:
Ինչպես նշում է Daily Mail-ը, խոսքը Կիմ Յոն Չհոլի մասին է, որին հանդիսավոր միջոցառման ժամանակ նկատել են Կիմ Չեն Ընի և մյուս բարձրաստիճան պաշտոնյաների հետ նույն շարքում նստած:
Աղբյուրը մանրամասնում է, որ Կիմ Յոն Չհոլը բանակցային գործընթացի շրջանակում մի քանի անգամ հանդիպել է ԱՄՆ պետքարտուղար Մայք Պոմպեոյի, ինչպես նաև Թրամփի հետ:
Ինչպես ավելի վաղ հայտնել էր tert.am-ը, հարավկորեական Chosun Ilbo պարբերականը գրել էր, որ Հանոյում Թրամփի և Կիմ Չեն Ընի՝ Փհենյանի միջուկային ծրագրի շուրջ բանակցությունների ձախողումից հետո, հյուսիսկորեական իշխանությունները մահապատժի են ենթարկել բանակցությունների համար պատասխանատու մի շարք դիվանագետների:
Նրանց շարքում է իբր եղել Կիմ Հյոկ Չհոլը, որը Հյուսիսային Կորեայի՝ ԱՄՆ հարցերով հատուկ դեսպանն էր ու զբաղվում էր Վաշինգտոնի հետ միջուկային բանակցությունների հարցով:
Ըստ պարբերականի՝ դիվանագետին մահապատժի ենթարկելու պատճառը եղել էր Թրամփ-Կիմ Չեն Ըն վերջին հանդիպման տապալումը:
Chosun Ilbo-ի տվյալներով՝ Կիմ Հյոկ Չհոլից բացի՝ նույն պատճառով մահապատժի է դատապարտվել Հյուսիսային Կորեայի արտգործնախարարության ևս 4 պաշտոնյա, որոնք ներգրավված են եղել Թրամփ-Կիմ Չեն Ըն հանդիպման նախապատրաստական աշխատանքներում:
Հայտնի է, որ նրանք մահապատժի են ենթարկվել մարտին՝ բանակցություններից կարճ ժամանակ անց:
Հիշեցնենք, որ ԱՄՆ-ի և Հյուսիսային Կորեայի ղեկավարների առաջին հանդիպումը կայացել էր 2018թ. ամռանը՝ Սինգապուրում: Այն ժամանակ կողմերին հաջողվել էր որոշ համաձայնություններ ձեռք բերել, ինչի շնորհիվ բանակցությունները հաջողված էին հայտարարվել:
Մինչդեռ այս տարվա փետրվարի վերջին կայացած բանակցություններն արդյունք չէին տվել. կողմերը չէին կարողացել ընդհանուր հայտարարի գալ փոխզիջումների հարցում: Մասնավորապես՝ Թրամփը մերժել էր Կիմ Չեն Ընի՝ արևմտյան պատժամիջոցները մասամբ չեղարկելու առաջարկն ու ժամանակից շուտ լքել հանդիպումը:
Ըստ վերլուծաբանների՝ Վաշինգտոնի և Փհենյանի միջուկային բանակցություններն այժմ փակուղու առաջ են:
