Կյանքի յուրաքանչյուր դրվագ իր երաժշտությունն ունի, ասմունքն էլ երաժշտություն է․ այս գաղափարը միավորել է դերասանուհի Արևիկ Գևորգյանին ու երգչուհի Սրբուկին, ովքեր համատեղ նոր նախագիծ ունեն, որի մասին օրեր առաջ ազդարարեցին պատրաստված տեսանյութով։ Արևիկը որպես դերասանուհի ներկայանալուց զատ համացանցում հայտնի է իր ասմունքի տեսանյութերով, որոնք լայն տարածում են գտնում։ Հենց այս մտքի շուրջ էլ համախմբվել են նա և Սրբուկը։
Tert.am Life–ը նրանց հետ զրուցել է համագործակցության, նույն բակում մեծանալու և մինչև այս միմյանց աշխատանքով հեռվից հիանալու մասին։ Բուն նախագծի մանրամասները նրանք դեռ չեն բացահայտում, սակայն խոստանում են հետաքրքիր ձևաչափով նորություն:
Արևիկը նկատեց, որ ստեղծագործություններն իր մի մասնիկն են դառնում։ «Տևական ժամանակ է, ինչ իմ մեջ ծնվել է շատ մեծ ու, ըստ իս, շատ գեղեցիկ մի գաղափար։ Երբ ես կարդում եմ, ծանոթանում եմ որևէ ստեղծագործության, և այն ինձ դուր է գալիս, սկսվում է մի հոգեվիճակ, որը ես անվանում եմ ապրումակցում: Սկսում եմ զգալ ստեղծագործության ռիթմը կամ դրա բացակայությունը, փորձում եմ հասկանալ տողերի արանքում ընկած շունչը, արդյոք այն հանգի՞ստ է, իսկ միգուցե այստեղ երաժշտություն չկա և հենց լռությո՞ւնն է տվյալ բանաստեղծությանը հատուկ երաժշտությունը: Գաղափարս կիսեցի Սրբուկի հետ, ով, հուրախություն ինձ, ոչ միայն համաձայնեց, այլև լիարժեք կիսեց իմ պատկերացումներն ու սկսվեց մի հրաշալի համագործակցություն, որտեղ երկուսս էլ հնարավորություն ունենք ազատ ստեղծագործելու»,– ասաց դերասանուհին։
Սրբուկն էլ նշեց, որ շատ է ոգևորվել այս առաջարկից․ «Ամիսներ առաջ Արևիկն ինձ զանգահարեց, ներկայացրեց իր միտքը, և ես այնպիսի էներգիա ստացա, այնպես ոգևորվեցի․․․ հասկացա՝ ինքն ինչ է ուզում, և ես ինչ կարող եմ անել։ Ձևաչափը նոր է և շատ հետաքրքիր։ Իմ ու Արևիկի նպատակը որակով և ճաշակով աշխատանք ստեղծելն է։ Մենք՝ որպես մշակույթի կրողներ, պետք է մտածենք լավ բան ստեղծելու ուղղությամբ»,– ասաց Սրբուկն ու հավելեց, որ իրենք իրար ստեղծագործական ազատություն են տվել, ինչը շատ կարևոր է։
Արևիկն իր հերթին կարևորեց միմյանց հանդեպ վստահությունը։ «Ինչպես ցանկացած բնագավառում, առավել ևս արվեստում, չափազանց կարևոր է փոխադարձ վստահությունը միմյանց հանդեպ, մի ուղղությամբ նայելն ու նույն գաղափարները կիսելը։ Քանի որ հիմա բուռն ստեղծագործական ընթացքի մեջ ենք, երկուսս էլ շատ մեծ ցանկության դեպքում անգամ չենք կարող չակերտները բացել: Սա անընդհատ ալեկոծվող օվկիանոս է, որը պետք է հանդարտվի, հանդարտվելուց հետո միայն կկարողանանք լիարժեք ներկայացնել: Առայժմ միայն կարող եմ ասել, որ մենք ու նրանք, ովքեր կցանկանան հաղորդակիցը լինել մեր նախագծին, փորձելու ենք միասին ուրախանալ, հուզվել, տխրել, հիշել, հուսալ, սպասել և երազել… կամ ուղղակի ապրել. չէ՞ որ մենք մի օր խիզախել ենք ծնվել»,– ընդգծեց Արևիկը։
Սրբուկը կարևորեց, որ ինքն ու Արևիկը շատ լավ զգում են իրար, համագործակցությունը շատ հարթ է ստացվում։ Նա պատմեց, որ իրենք նույն բակում են մեծացել, մանկուց են ճանաչում իրար, բայց երբեք չեն պատկերացրել, որ մի օր համագործակցության եզր կգտնեն։
«Ես ու Արևիկն իրար ճանաչում ենք փոքր տարիքից՝ նույն բակից ենք, բայց երբեք չէինք պատկերացնի, որ կմեծանանք և միասին ինչ–որ բան կփորձենք ստեղծել։ Ով կպատկերացներ, որ կմեծանանք, Արևիկը կդառնա գերազանց դերասանուհի, ես իմ կարիերան կունենամ, մի օր էլ այսպիսի աշխատանք կներկայացնենք։ Կյանքը լի է անակնկալներով։ Մենք այն ժամանակ շատ մտերիմ չենք եղել, բայց միշտ համակրել ենք իրար։ Ես շատ եմ հավանում Արևիկի աշխատանքը, ինքն էլ, կարծում եմ, իմը, որովհետև շատ ենք խոսել այդ մասին։ Հետաքրքիր է, որ միմյանց խորությամբ ճանաչելու պրոցեսը նոր է սկսվում, բայց տպավորություն է, որ ամբողջ կյանքում շատ խորը ճանաչել ենք իրար։ Կես բառից իրար հասկանում ենք, արագ ըմբռնում ենք միմյանց մտքերը։ Արդյունքում մեր համագործակցությունը շատ հեշտ է ստացվում։ Երևի, մեր տեսակները մոտ են իրար, դրանից է»,– ասաց Սրբուկն ու հավելեց, որ թիմ ունեն, որի յուրաքանչյուր անդամն իր գործը շատ լավ է անում՝ չխանգարելով մյուսին, ինչը շատ կարևոր է։
Արևիկն էլ նկատեց, որ գաղափարը Սրբուկի հետ իրականացնելու միտքը պատահական չի ծնվել․ «Ինձ համար շատ կարևոր էր, որ երգիչը կամ երգչուհին, ում հետ պիտի սկսեի համագործակցությունը անպայման ոչ միայն լավ վոկալ ունեցող մեկը լիներ, այլև մարդ, ով բառի ամենաուղիղ իմաստով արտիստ է։ Սրբուկին այդ իմաստով միշտ առանձնացրել եմ։ Երգերի նրա մեկնաբանությունները երգից առանձին կյանքով ապրող, նոր հոգի, նոր շունչ ստացած ստեղծագործություններ են։ Ամեն մի երգ նրա կատարմամբ դառնում է երգ-իրադարձություն, որտեղ նա և՜ գլխավոր գործող անձն է, և՜ ունկնդրին երգի հետ կապող անտեսանելի ուժը»։
