Մաշա Մնջոյանի ելույթը «Ավստրալիայի ձայնը» նախագծի «Կույր լսումների» փուլում նախ արժանացավ ժյուրիի բոլոր անդամների բուռն արձագանքին. պտտվեցին բոլորը, հետո արդեն երգչուհու հաջողությունը ողողեց սոցցանցերի հայկական տիրույթը: 17 տարեկանում «Հայաստանի ձայնը» նախագծի հաղթող դարձած Մաշան BRAVO.am-ի հետ զրույցում խոսել է նոր մարտահրավերների եւ Սիդնեյում հաստատվելու առիթի մասին:
«Սիրում եմ Ավստրալիան»
Արդեն մեկուկես տարի է, ինչ Սիդնեյում եմ: Նպատակս այստեղ սովորելն էր. Ավստրալական երաժշտական ինստիտուտի ուսանող եմ: Բազմիցս նշել եմ, որ այս երկիրը շատ եմ սիրում, այդ իսկ պատճառով էլ հենց այստեղ ուսանելն ընտրեցի ու եկա:
«Այս անգամ ոչինչ չխանգարեց»
Հայաստանից միշտ հետեւել եմ «Ավստրալիայի ձայն»-ին, լավագույններից էր ե՛ւ որակապես, ե՛ւ մասնակիցների վոկալներով: Այն ինձ համար առաջատարներից է եղել, եւ միշտ էլ հոգուս խորքում փափագում էի, որ մի օր կմասնակցեմ: Սակայն այլ երկրից լինելն այդ հնարավորությունը չէր տալիս: Այս անգամ ոչինչ չխանգարեց, քանի որ այստեղ սովորում եմ, վիզայի խնդիր էլ չկար: Մտածեցի՝ եթե չփորձեմ, հաստատ կզղջամ:
«Չեմ ուզում համեմատել»
Երեւի չարժե ասել, թե ինչքան լարված էի: Հաճախ են հարցնում՝ արդյոք շատ է տարբերվում «Հայաստանի ձայնը» մրցույթից: Փորձում եմ համեմատել, բայց եւ չեմ էլ ուզում համեմատել: Թեեւ նույն ձեւաչափն է, նույն նախագիծը, բայց անհամեմատելի են ու շատ տարբեր. այլազգիներ, այլ մտածելակերպ, բոլորովին այլ մատուցում: Շատ պրոֆեսիոնալ է կազմակերպված, սիրալիր ու ջերմ են բոլորը: Իսկ ժյուրիից մասին խոսք չկա. երկուսն Ավստրալիայում հայտնի աստղեր են, մյուս երկուսն էլ արտերկրից են՝ եւս շատ սիրելի արտիստներ:
Երեխայի նման
Եթե առաջին անգամ ոչ ոք դեռ չգիտեր ինձ եւ ես ներկայացնում էի իմ ձայնային տվյալները, այս անգամ ես ներկայացնում էի նաեւ մի ամբողջ ազգ: Այդպիսի պատասխանատվություն էի վերցրել ինձ վրա: Երեխայի նման հուզվել էի եւ կարծես առաջին անգամ բեմ դուրս գայի:
Գրավել է
Մեծ ցանկություն ունեի ժյուրիի 4 անդամների սրտերն էլ գրավել: Ոչ մեկը չի տեսնում քեզ, քո տեսքը, պարզապես, զգալով քո ձայնն ու քեզ, պտտվում են: Եթե ձայնդ տեղ է հասնում, ուրեմն՝ ասելիք կա: Ուրախ եմ, որ առաջին փուլում կարողացա նման հաջողություն գրանցել:
Արձագանքը
Անթիվ-անհամար նամակներ ու զանգեր եմ ստանում, ինչը ե՛ւ սպասելի էր, ե՛ւ անսպասելի: Ավստրալացիները նույնպես շատ-շատ լավ մեկնաբանություններ են գրում: Կան նաեւ ոչ այնքան լավ կարծիքներ, ինչը նույնպես նորմալ է մրցույթի ժամանակ: Իսկ հայերն, ինչպես միշտ, հայրենակցի կողքին են: Գնահատելի է, շնորհակալ եմ, որ միշտ պատրաստակամ են քաջալերել:
Հաջորդիվ
Ոչինչ չեմ կարող ասել եւ բացել փակագծերը, քանզի չի թույլատրվում: Միայն կարող եմ ասել, որ հաջորդը զուգերգի փուլն է, իսկ ընթացիկ նորություններին կարելի է հետեւել իմ եւ մրցույթի սոցցանցային էջերում: Անչափ շնորհակալ եմ բոլորին՝ ջերմության համար:
Աղբյուրը՝ bravo.am
