Ամերիկյան հեռուստաաստղ Քիմ Քարդաշյանը, որը ցանկանում է գնալ հանգուցյալ հոր՝ ԱՄՆ-ում հայտնի փաստաբան Ռոբերտ Քարդաշյանի հետքերով և այժմ փաստաբանի մասնագիտական կրթություն է ստանում, լուսանկար է հրապարակել քառակի սպանության համար մահապատժի դատապարտված Քևին Կուպերի հետ:
Ինչպես նշում է Daily Mail-ը, լուսանկարն արվել է Սան Քվենտին քաղաքի բանտում: 38-ամյա հայուհին իրավական արշավ է սկսել Կուպերի ազատ արձակմանը հասնելու համար, քանի որ վստահ է, որ տղամարդն անմեղ է:
Քարդաշյանն անցած հինգշաբթի հանդիպել է կալանավորի հետ և մոտ երկու ժամ զրուցել նրա հետ: Քարդաշյանը «հուզիչ» հանդիպման մասին գրել է իր թվիթերյան էջում՝ ընդգծելով, որ Կուպերը, ըստ իրեն, խելացի է, ազնիվ ու անմեղ:
Կուպերը մահապատժի է դատապարտվել 1983թ.՝ Լոս Անջելեսում ամուսինների, նրանց տասնամյա դստեր և նրա ընկերոջ սպանության համար:
Իր կալանավորումից ի վեր Կուպերն անընդհատ հայտարարել է, որ անմեղ է:
Անցած տարվա հոկտեմբերին Քարդաշյանը Կալիֆոռնիայի նախկին նահանգապետ Ջերի Բրաունին խնդրել էր վերաբացել այս գործն ու պարզել՝ արդյոք Կուպերն է մարդասպանը: Այժմ նրանք սպասում են նոր քննության արդյունքներին:
