Հակոբ Հակոբյան և Արմեն Հովհաննիսյան դուետը շուտով կներկայանա պրեմիերայով։ Երգը նոր է, բայց իր ոճով նման կլինի «Տաք ա-Տաք ա» ստեղծագործությանը։ Tert.am Life-ը Հակոբ Հակոբյանի հետ զրուցել է ինչպես սպասվող պրեմիերայի մանրամասների, այնպես էլ իրենց դուետի հաջողության ու սպասվող այլ նորությունների մասին։
Նրանից հետաքրքրվեցինք` արդյոք «Տաք ա-Տաք ա» երգի հաջողությունն ու youtube-յան դիտումներն իրենց ստիպեցին ևս մեկ գործ ներկայացնել նույն ոճում. ««Տաք ա-Տաք ա» երգը Youtube–ում վեց ամսում ավելի քան 15.5 միլիոն դիտում ունի, բայց այդ հաջողությունից հետո մենք այլ ոճի ստեղծագործությամբ էլ ենք ներկայացել ։ Խոսքս հայրենասիրական «Հով արեք»-ի մասին է, որը բոլորովին նման չէր նախորդին և կապ էլ չուներ, թե որքան դիտումներ է ունեցել։ Մենք տարբեր ժանրերով ենք ներկայանում, այս ընթացքում որոշեցինք սիրային թեմայով ևս մեկ երգ երգել»։
Կատարողը դժվարացավ գնահատել, թե որն է այդ գործի հաջողության գրավականը, բայց առանձնացրեց մի քանի հանգամանք, որոնցից ամենահետաքրքիրը լսարանի տարիքային շեմն է:
«Շատ հանգամանքներ կային, որոնց շնորհիվ այն ունեցավ հաջողություն՝ Կարեն-Սևակի կատարած աշխատանքը, Ադրիանայի տեսահոլովակում նկարահանվելը, գաղափարը, մենք, բայց հիմնականում փոքրիկները, որոնք մեր մշտական ու մեծ լսարանն են։ Մեր լսարանի մեծ մասը երեխաներն են՝ նորածիններից մինչև պատանիներ։ Սա միանշանակ չէ, բայց հիմնական արձագանքներից ենք եկել այս ենթադրությանը։ Մեզ մոտենալիս միանգամից ասում են` գիտե՞ք, մեր երեխաները ձեզ շատ են սիրում»,– ասաց Հակոբը։
Նրա խոսքով` նոր աշխատանքին մոտեցել են պատասխանատվությամբ ու լրջությամբ, բայց չի կարող ասել` այն կունենա՞ նույն հաջողությունը, թե՞ ոչ, ամեն դեպքում հույս ունեն։ Տեսահոլովակը հասանելի կլինի շուտով, մինչ այդ ստեղծագործական թիմն աշխատում է գաղափարների վրա։
Ըստ երգչի` շատ մտքեր կան, բայց չգիտեն` եղած առաջարկներից որը կընտրեն։ Դիտարկում են նաև այն տարբերակը, որ հոլովակը լինի հեռուստադիտողներին հայտնի դերասանուհու մասնակցությամբ, բայց դա դեռ վերջնական չէ։
«Հիմա ամեն ինչ քննարկման փուլում է, աշխատում ենք։ Այս մասին առաջին անգամ եմ խոսում, որովհետև անգամ երգի անունը չգիտենք։ Անվան հետ կապված նույնպես քննարկումներ են գնում և որոշում ենք, թե ինչ անունով այն հասանելի դառնա՝ պետք է հեղինակի հետ վերջնական որոշենք»,– ասաց նա։ Անդրադառնալով առաջիկա այլ նորություններին` Հակոբը հայտնեց, որ ԱՄՆ-ում համերգ են ունենալու, որն իրենց համար հետաքրքիր ձևաչափով է կազմակերպված՝ նավի վրա է լինելու։
