Էթիկայի նորմերի խախտման պատճառով «Լավ երեկո» հաղորդման ստեղծագործական խումբը նկատողություն է ստացել

Հանրային հեռուստաընկերությունը արդարադատության նախարար Դավիթ Հարությունյանի հետ քննարկում է ունեցել «Լավ երեկո» հաղորդման ռեպորտաժի վերաբերյալ, որը բուռն քննարկման թեմա է դարձել։

«Հանրային հեռուստաընկերությունն այս թեմայով, իհարկե, ունեցել է քննարկում նախարարի հետ։ Ցավում ենք, որ մեր ստեղծագործական խմբի՝ առանց ենթատեքստի արած նյութը, հումորային կոնտեքստից վերածվել է նման խնդրի և հասարակության որոշ շրջանակների մոտ դժգոհություն է  առաջացրել:  Հավատացնում ենք, որ ստեղծագործական խումբը որևէ մեկին վիրավորելու միտում չի ունեցել», – Aysor.am-ին ասացին Հանրային հեռուստաընկերության հասարակայնության հետ կապի բաժնից։

«Իսկ էթիկայի նորմերի խախտման պատճառով, «Լավ երեկո» ժամանցային հաղորդման ստեղծագործական խումբը նկատողություն է ստացել: Տեղեկացնում ենք նաև, որ թողարկումը հանվել է թե ՛ Յութուբյան էջից, թե ՛մեր պաշտոնական կայքից», – նշեցին Հանրայինում։

Հիշեցնենք, որ քննադատության առարկա էր դարձել մարտի 8-ի կապակցությամբ «Լավ երեկո» հաղորդման լրագրող Արուս Տիգրանյանի պատրաստած ռեպորտաժը «Աբովյան» ՔԿՀ-ից (կանանց գաղութ):

Աղբյուրը՝ aysor.am