Երեկ Երևանի Մոսկվա կինոթատրոնում տեղի ունեցավ ամերիկաբնակ Ռոբերտ Կարապետյանի << Սուրբ խաչ, Սուբ Երրորդություն, Հույսի խորան>> խորագիրը կրող լուսանկարների ցուցահանդեսի բացման արարողությունը: Իր աշխատանքներում արվեստագետը ամենայն վեհությամբ ներկայացնում է հոգևոր այդ հզոր խորհրդանիշի՝ խաչի զորությունը՝ տալով նույն խաչին շուրջ 40 մեկնաբանություն:
Ամեն անգամ Հայաստան գալով՝ Ռոբերտ Կարապետյանը փորձում է հայկական շունչը, հոգին կրող հուշեր հավաքել լուսանկարների տեսքով, որոնց շնորհիվ մտադիր է իրենց արմատներին մոտեցնել հայրենիքից հեռու գտնվող հայերին:
Հայաստանում սա լուսանկարչի երրորդ անհատական ցուցահանդեսն է և, մինչ Հայաստան բերելը, լուսանկարների ցուցադրություն է կազմակերպվել նախ Նյու Յորքի Ազգային վարժարանում, որտեղ բավական մեծ ոգևորությամբ է ընդունվել անգամ հոգևորականության շրջանում:
Նկարիչը, կիսվելով իր ապագա պլաններով, նշեց, որ իր 80-ամյակին ընդառաջ պատրաստելու է հոբելյանական ցուցահանդես, որի թեման, սակայն, չցանկացավ բացահայտել: Սպասենք մեր հայրենակցի ստեղծագործական նորանոր գլուխգործոցներին: