Մի խումբ դեմոկրատ և հանրապետական սենատորներ Կոնգրես են ներկայացրել օրինագիծ՝ ռուս ընդդիմադիր գործիչ Ալեքսեյ Նավալնիի գործով հակառուսական պատժամիջոցներ սահմանելու մասին։ Այս մասին հայտնում է սենատոր Մարկո Ռուբիոյի (հանրապետական, Ֆլորիդա նահանգ) մամուլի ծառայությունը, փոխանցում է ՏԱՍՍ-ը։
Օրինագիծը նախատեսում է կետային պատժամիջոցների սահմանում ռուս պաշտոնյաների նկատմամբ, ովքեր ներգրավված են միջազգային իրավունքի կոպիտ խախտումների մեջ, մասնավորապես խոսքը վերաբերում է Ալեքսեյ Նավալնու թունավորմանն ու բանտարկությանը։
Օրինագիծը վաշինգտոնյան վարչակազմից հաշվետվություն է պահանջում նաև ռուս ընդդիմադիր գործիչ Բորիս Նեմցովի սպանության վերաբերյալ։
Օրինագծի կետերից մեկը նվիրված է «Հյուսիսային հոսք-2» գազատարին։ Կոնգրեսը կարծում է, որ պետքարտուղարը պետք է կոչ անի Գերմանիայի կառավարությանը հրաժարվելու գազատարի կառուցման օժանդակությունից։