Մարտի 22-ին ԱՄՆ-ում ավարտվել է հատուկ դատախազ Ռոբերտ Մյուլերի վարած հետաքննությունը, որը վերաբերում էր 2016թ. կայացած նախագահական ընտրություններին Ռուսաստանի հավանական միջամտությանը:
Այժմ, ինչպես հայտնում է The Guardian-ը, երկրի գլխավոր դատախազ Ուիլյամ Բարը երկամյա հետաքննության զեկույցի ուսումնասիրությունից հետո ամփոփագիր է ներկայացրել, որում ի մի են բերված սկանդալային հետաքննության առանցքային բացահայտումները:
Ըստ գլխավոր դատախազի՝ Մյուլերի հետաքննությունը չի ապացուցել, որ Թրամփի նախընտրական շտաբի անդամները դավադրություն են կազմակերպել կամ ընտրություններին միջամտելու գործողություններում համակարգված գործել են ՌԴ կառավարության հետ:
Այնուհանդերձ՝ Մյուլերն անհերքելի ապացույց է գտել առ այն, որ Ռուսաստանն իրոք միջամտել է ընտրություններին՝ թե՛ ապատեղեկատվության տարածման, թե՛ մրցապայքարի ֆավորիտներից մեկը համարվող Հիլարի Քլինթոնի էլեկտրոնային փոստի նկատմամբ կատարված հաքերային հարձակման միջոցով:
Միևնույն ժամանակ հետաքննության արդյունքները ցույց են տվել, որ Ռուսաստանի հետ առնչություն ունեցող անձանցից Թրամփի նախընտրական շտաբին ուղղված օգնության բազում առաջարկներ են եղել:
Ամփոփագրում անդրադարձ է արվել նաև Թրամփի սկանդալային որոշումներից մեկին՝ Հետաքննությունների դաշնային բյուրոյի տնօրեն Ջեյմս Կոմիին աշխատանքից հեռացնելուն, որը դիտարկվում էր որպես արդարադատության խոչընդոտմանն ուղղված քայլ: Հայտնի է, որ Կոմին Թրամփին մեղադրում էր Ռուսաստանի հետ «գործարքի» մեջ մտնելու համար:
Սակայն Մյուլերի վարած հետաքննության արդյունքները փաստում են, որ նախագահ Թրամփի՝ Կոմիին աշխատանքից հեռացնելու քայլն արդարության դեմ ուղղված հանցանք չէր, սակայն միևնույն ժամանակ նրան չի կարելի լրիվ «անմեղ» համարել:
Գլխավոր դատախազն իր ամփոփագրում նաև նշել է, որ հետաքննության շրջանակում հարցաքննվել է 34 մարդ, այդ թվում՝ Թրամփի նախընտրական շտաբի նախկին պետ Փոլ Մանաֆորտը, նախկին փաստաբան Մայքլ Քոհենն ու ազգային անվտանգության հարցերով նախկին խորհրդական Մայք Ֆլինը: Հայտնի է, որ հարցաքննություններն այսքանով ավարտվելու են:
Ինչ վերաբերում է Թրամփի արձագանքին, ապա նա իր թվիթերյան միկրոբլոգում գրել է. «Ոչ մի դավադրություն, արդարադատության ոչ մի խոչընդոտում, ամբողջական ու վերջնական արդարացում: Հզոր պահեք Ամերիկան»:
Ինչպես ավելի վաղ հայտնել էր tert.am-ը, հետաքննությունը սկսվել էր նախագահ Դոնալդ Թրամփի երդմնակալությունից հետո, երբ լուրջ կասկածներ էին հայտնվել առ այն, որ Կրեմլի միջամտությունը նպաստել է Թրամփի հաղթանակին:
Թրամփը բազմիցս հերքել էր ռուսական միջամտության հավանականությունը՝ Մյուլերին կոչ անելով դադարեցնել «ամոթալի» հետաքննությունը՝ այն «վհուկների որս» անվանելով: Պաշտոնական Մոսկվան ևս հայտարարել էր, որ որևէ առնչություն չունի 2016թ. ընտրությունների հետ:
Աղբյուրը` https://www.tert.am/am/news/2019/03/25/key-findings/2956188
