Վրաստանի 3-րդ նախագահ և Օդեսայի շրջանի նախկին նահանգապետ Միխեիլ Սաակաշվիլին Foreign Policy հարթակում հրապարակած հոդվածում հայտնել է, թե որ երկրները կարող են Ռուսաստանի Դաշնության հարձակման թիրախ դառնալ:
Նրա խոսքով՝ դրանք ոչ թե նախկին ԽՍՀՄ երկրներ կլինեն, այլ Եվրամիության երկրներ, որոնք չեն մտնում ՆԱՏՕ-ի կազմի մեջ՝ Ֆինլանդիան կամ Շվեդիան:
Նման սցենարի դեպքում Ռուսաստանը ՆԱՏՕ-ի անդամ երկրների միասնական դիմակայությանը չի հանդիպի: Սաակաշվիլին չի կարծում, որ ռուսական տանկերն առանց խոչընդոտների Հելսինկի կամ Ստոկհոլմ կներխուժեն, սակայն, հաշվի առնելով Ռուսաստանի՝ հյուսիսային ճակատում ամրապնդած ռազմավարական ուժերը, դա միանգամային հավանական է:
Հոդվածում Վրաստանի նախկին նախագահն անդրադառնում է Կրեմլի աջակցությունը վայելող լրատվամիջոցների մարտավարությանը, որոնք անընդհատ ահաբեկում են ռուս լսարանին «ՆԱՏՕ-ի շրջափակման և արևմտյան ռուսաֆոբության» մասին հաղորդումներով:
Սաակաշվիլիի խոսքով՝ Ռուսաստանի նպատակը երկրի ներսում ճնշման լծակների նկատմամբ վերահսկողության ուժեղացումն է, իսկ առավել թույլ հարևան երկիր ներխուժելը, նրա համոզմամբ, ավելի արդյունավետ միջոց կլինի իշխանությունների վարկանիշը բարձրացնելու համար, քան, օրինակ, առողջապահական համակարգի բարելավումը:
