Վրաստանը, Ռումինիան, Ադրբեջանն ու Թուրքմենստանը «Կասպից ծով-Սև ծով» միջազգային բեռնափոխադրման միջանցք ձևավորելու մասին համաձայնագիր ստորագրեցին: Այսօր չորս երկրների ԱԳ նախարարները հանդիպել են Բուխարեստում գործարքը ստորագրելու համար: Վրաստանի ԱԳ նախարար Դավիթ Զալկալիանին իր թվիթերյան պաշտոնական միկրոբլոգի էջում գրառում է կատարել հանդիպման և գործարքի մասին՝ նշելով, որ միջանցքը նոր հնարավորություններ է ստեղծում տարածաշրջանային, ինչպես նաև՝ Արևմուտք-Արևելք կապերի զարգացման համար:
Նախարարներն իրենց խոսքում նշել են, որ Կենտրոնական Ասիան Եվրոպային երկու ծովերի միջոցով կապող նոր միջանցքը լինելու է ամենակարճն ու ամենաշահութաբերը: Նոր երթուղին զարգացնելու նպատակով փորձագիտական խումբ է ձևավորվելու, որը զբաղվելու է տարիֆների նույնականացմամբ և մաքսային գործընթացների դյուրացմամբ:
Վրաստանի պատվիրակությունը շեշտել է, որ Վրաստանը տարածաշրջանային լոգիստիկ կենտրոն դարձնելը կառավարության առաջնահերթությունն է, և տարբեր ծրագրեր են իրականացվում այդ նպատակով: Չորս երկրների ԱԳ նախարարների քառակողմ հանդիպումները շարունակական բնույթ են կրելու և անցկացվելու են տարին մեկ անգամ: Հաջորդ հանդիպումը տեղի է ունենալու Թուրքմենստանում:
Աղբյուրը` https://bit.ly/2EMxqOg
