«Բարիկադներ քանդելու» մասին ՔՊ–ի վերջին շրջանի հայտարարությունները, «Փաստ» օրաթերթի համոզմամբ, իրականում շատ ավելի լուրջ ու խորքային պատճառներ ունեն: Դրանով, ըստ թերթի փորձ է արվում նախապատրաստել հանրությանը խորհրդարանական ընտրությունների նախընտրական ցուցակի «անակնկալներին»:
«Ունենալով կադրային լուրջ խնդիրներ, եղածը սպառելով գործադիրում ու Երեւանի ավագանու կազմում բաշխելով, այսօր ՔՊ–ն բավական բարդ կացության առջև է՝ համամասնական ցուցակը կազմելու առումով, քանզի մի կողմից անհրաժեշտ է ընդգրկել հանրության համար ընկալելի և ընդունելի կերպարներ, մյուս կողմից՝ այնպիսիք, որոնք արդյունավետ կլինեն ԱԺ–ում»,– գրում է թերթը:
Թերթը նաև հայտնում է, որ ՔՊ–ն ստիպված է լինելու նախընտրական ցուցակում ներգրավել անկուսակցականների, այդ թվում՝ նախկին իշխանությունների հետ ակտիվ համագործակցած, որոնց մեջ կլինեն նաև մարդիկ, ովքեր հանրության կողմից միանշանակ չեն ընդունվի։
«Հասկանալի է, որ հիմա ՔՊ–ի «դռան» առջև հավատարմության երդում տվողների, դարձի եկողների, խնդրողների լուրջ հերթ է, Փաշինյանին մոտ կանգնածների միջոցով ամեն մեկն իր լոբբինգն է փորձում անել»,– գրում է «Փաստը» և հավելում, որ Փաշինյանի առաջնային խնդիրն այսօր ցուցակի որակի, ընկալելիության և սեփական թիմակիցներին չնեղացնելու համադրելիությունն ապահովելն է:
Աղբյուրը՝ armeniasputnik.am
