«Երեխայի լեզվով ասած՝ ամպի չափ երևակայություն է պետք մտածելու համար, թե «Լույս» դաշինքը համագործակցում է նախկին ռեժիմի հետ՝ նրանց հետ բերելու համար :Խնդիրն այն է, պարոն վարչապետ ջան, որ դուք տեսակետ եք ասում, որով մեղադրում եք բոլորին, ու եթե ձայն չես հանում, մտածում են, թե լռությունը համաձայնության նշան է, ձայն ենք հանում, ասում են՝ ինչի եք ձեր վրա վերցնում։ Հիմա ոնց անենք, մենք էլ կարող ենք այդպիսի տեսակետներ ասել», – քարոզարշավին հայտարարեց Երևանու ավագանու ընտրություններին մասնակցող «Լույս» դաշինքի մաս կազմող «Հանրապետություն» կուսակցության նախագահ Արամ Սարգսյանը։
«Խորապես համոզված եմ, որ մեր ժողովուրդը շատ ավելի շատ սիրո ու հանդուրժողականության մթնոլորտ է ուզում, մեր ժողովուրդը չի ուզում ինքն իր հետ կռվել, ինքը հոգնել է իր հետ կռվելուց։ Հերիք է էդ ասֆալտին փռելուց, քշելուց, դիակներից ու ինչերից խոսենք, հերիք է։ Էս ընտրարշավում չկա որևէ ուժ, որի դեմ պայքարես, էստեղ եղած բոլոր ուժերն էլ պայքարել են նախկինի դեմ։ Էդ նախկինն էլ՝ Հանրապետական կուսակցությունը, թեկնածու չի առաջադրել։ Ի՞նչ սև ու սպիտակի խնդիր է։ Էդ նույն «Բարգավաճ Հայաստան» կուսակցությունը համապատասխան պահին կանգնեց Ձեր կողքին, «Դաշնակցությունն» ու մենք եկանք, քվեարկեցինք։ Բա էդ ասելու բան է, Le Monde-ին ասում եք, թե երբ վարչապետ էի գալիս, 4 ձայնի ակնկալիք ունեի, այդ 4-ից մեկն էլ իմ ձայնն էր»-ասաց նա՝դիմելով վարչապետին և շարունակեց.
«Կարծում եմ՝ հաստատ մտածել եք, որ այդ 4 ձայնից մեկն էլ իմն էր, պարոն վարչապետ։ Ո՞նց կարելի է նեղացնել Ձեզ հետ ճամփա անցած թիմին։ Հո խնդիրը միայն նրանում չի, թե ով է Ձեզ հետ քայլել։ Մտածեք, թե ոնց եք անելու արթահերթ ընտրությունների գնալու ժամանակ: Ու էն մարդիկ, ովքեր Ձեզ օգնել են, կարող է էլ չօգնեն»:
