Շատ չար մարդիկ կան, խոսում են. գեղեցկության մրցույթի կազմակերպիչը՝ քննադատությունների մասին

«Հայաստանի գեղեցկուհի 2019» մրցույթի կազմակերպիչ Մամիկոն Դանիելյանը չի կիսում հաղթողին՝ Հայկուհի Մաթեւոսյանին ուղղված քննադատությունները: Մայիսի 11-ին կայացած մրցույթից հետո կարծիքներ են հնչում, որ 19-ամյա Հայկուհին պլաստիկ վիրահատությունների է դիմել ու որ արժանի չէր հաղթանակի: Armtimes.com-ի հետ զրույցում Դանիելյանն ըդգծեց, որ ժյուրիի անդամները, որոնք որոշում են կայացրել, եղել են պրոֆեսիոնալներ:

«Ժյուրի է եղել, եւ այս տարի ես գտնում եմ՝ պրոֆեսիոնալ մարդիկ շատ են եղել համեմատած ուրիշ տարիների հետ: Եղել են նաեւ հեղինակավոր մարդիկ, օրինակ, Լյուբով Ուսպենսկայան: Եղել են մարդիկ՝ հայեր, որոնք Ռուսաստանում պաշտոններ են զբաղեցնում, հայկական համայնքի հետ մեծ կապեր ունեն: Պրոֆեսիոնալները գերակշռել են, եւ ամենաբարձր բալերը ստացել է Հայկուհի Մաթեւոսյանը: Ժյուրիի հետ խոսել եմ, բոլորը գտնում են, որ սխալ ընտրություն չեն կատարել: Այո՛, եղել են մարդիկ, որ Հայկուհուն 2-րդ տեղ են տվել, եղել են, որ առաջին տեղ են տվել, բայց բալերով ամենաշատը նա է հավաքել»,- ասաց Դանիելյանը:

Հաղթողի արտաքինի հետ կապված քննադատությունները, ըստ կազմակերպչի, հիմքեր չունեն: Նա խոստովանեց, որ նախնական փուլերում մասնակիցների մեծ մասի մոտ է քթի հետ կապված վիրահատական միջամտություն նկատվել, ու նրանք նշել է, որ միայն միջնապատի վիրահատություն է: Եվ քանի որ նման շատ մասնակիցներ են եղել, կազմակերպիչները որոշել են անտեսել դա: Ինչ վերաբերում է Հայկուհուն, ապա Դանիելյանի խոսքով՝ նրա մոտ եւս միայն միջնապատի վիրահատություն է:

«Ունի 1 վիրահատություն՝ 16 տարեկանում միջնապատի հետ կապված վիրահատությունը: Շրթունքներն իրենն են, փոքրուց նկարները բոլորը տեսել եմ, ծնողների հետ էլ եմ հանդիպել, եղբորն էլ, որ տեսնեք նույնպիսի շրթունքներ ունի: Ուրիշ ոչ մի միջամտություն չկա արված»,- ասաց նա:

Դանիելյանը մրցույթի հետ կապված քննադատություններ գրեթե չի լսել: Խոստովանում է, սակայն, որ թերություններ կան, ու ինքը պատրաստվում է շտկել դրանք մինչեւ հաջորդ մրցույթը: Դրանցից մեկը կապված է քվեարկության հետ: Ինչ վերաբերում է անցնող շաբաթվա ընթացքում հնչող բացասական կարծիքներին, մտածում է, որ դրանք չար մարդկանց խոսակցություններ են:

«Շատ չար մարդիկ կան, խոսում են, գիտեմ մոտավորապես՝ որ զանգվածը կլինի»,- ասաց նա՝ չցանկանալով անուններ նշել:

Հայկուհի Մաթեւոսյանը մի քանի օրից մեկնելու է հանգստի, որից հետո շարունակելու է աշխատել: Ունի մի շարք առաջարկներ՝ այդ թվում ռուսական ֆիլմում նկարահանվելու: Դեռ պետք է ընտրություն կատարի:

Հաջորդ «Հայաստանի գեղեկցուհի» մրցույթը տեղի է ունենալու 2020 թ.: Մինչեւ այդ Մամիկոն Դանիելյանը պատրաստվում է քննարկումներ ունենալ «Միսս աշխարհ» ու «Միսս տիեզերք» մրցույթների հետ: Ցանկանում է հասկանալ՝ որքանով է հնարավոր համագործակցել նրանց հետ:

arenanews.am