ԱՄՆ Նյու Ջերսի նահանգում տղամարդը ծննդյան օրվա առթիվ 6 օրվա ընթացքում ավելի քան 15 հազար հեռախոսազանգ և հաղորդագրություն է ստացել, գրում է Oddity Central կայքը:
Բանն այն է, որ Քրիս Ֆերի անունով տղամարդը սովորաբար անհարմար է զգում, երբ իրեն ծննդյան առթիվ շնորհավորում են: Նախկինում նրա որդիները դրա հետ կապված բազմիցս կատակներ են արել, իսկ այս տարի հոր 62-ամյակի առթիվ ճանապարհին գովազդային վահանակ են վարձել՝ դրա վրա տեղադրելով Քրիսի հեռախոսահամարը և խնդրելով մարդկանց շնորհավորանքներ հղել վերջինիս:
Հակառակ սպասելիքների՝ կատակը մի քանի հեռախոսազանգով չի սահմանափակվել. գովազդային վահանակի լուսանկարը հայտնվել է համացանցում, որից հետո ավելի քան 15 հազար մարդ աշխարհի տարբեր ծայրերից զանգել կամ հաղորդագրություն է ուղարկել Քրիսին:
Բանը հասել է նրան, որ Քրիսն այլևս չի հասցրել պատասխանել բոլոր զանգերին ու հաղորդագրություններին և որոշել է պատասխան հաղորդագրություն ձայնագրել հեռախոսի ինքնապատասխանիչին: «Շնորհակալ եմ զանգի և բարեմաղթանքների համար, ես դա իսկապես շատ եմ գնահատում»,- ասվում է ձայնագրության մեջ:
Քրիսին կատակի մասին հայտնել է զանգահարողներից մեկը:«Իսկ դուք որտեղի՞ց գիտեք, որ շուտով իմ ծննդյան տարեդարձն է»,- հարցրել է Քրիսը:«Գովազդային վահանակում եմ տեսել»,- պատասխանել է զանգահարողը, ինչից հետո Քրիսը գտել է վահանակը և լուսանկարվել դրա ֆոնին:
Խնդիրն այն է, որ Քրիսի տարեդարձը մարտի 16-ին է, իսկ գովազդային վահանակը կհանվի միայն ապրիլ ամսին, ինչը հիմք է տալիս ենթադրելու, որ Քրիսի հեռախոսը դեռևս մի քանի շաբաթ կզանգահարի:
Աղբյուրը` tert.am
