ՀՀ ՊՆ–ն հաստատել էր ինֆորմացիան, որ Տավուշի մարզում մեր զինված ուժերը բարելավել են դիրքերը։
«Չինարին այլևս չի կարող գնդակոծվել»։ Այս մասին Facebook-յան պաշտոնական էջում այսօր գրել էՀՀ ԱԺ նախագահ Արարատ Միրզոյանը։«Հայաստան մտնող գազամուղի անվտանգությունը ևս ապահովված է։ Փառք հայ զինվորին։ Փառք Հայոց բանակին»,– գրել է Միրզոյանը։
Օգոստոսի 17-ին ՀՀ ՊՆ–ն պաշտոնապես հաստատեց` հայկական զինուժը Տավուշի մարզում բարելավել է իր դիրքերը։Թե կոնկրետ ինչ հատված և ինչ չափով տարածք է հայտնվել ՀՀ ԶՈւ վերահսկողության տակ, նախարարությունը չի բացահայտում։
Փոխարենն այս հայտարարությունից հետո` այսօր` օգոստոսի 19-ին, որոշ բացահայտումներ սկսեցին անել այլ աղբյուրներ, այդ թվում` ՀՀ ԱԺ նախագահ Արարատ Միրզոյանը և «Իմ քայլի» որոշ պատգամավորներ։ԱԺ պատգամավոր, «Իմ քայլը» խմբակցության անդամ Գայանե Աբրահամյանն ավելի հեռուն է գնացել` հայտնելով, որ հայկական զինուժը 140 հա տարածք է գրավել։«Չինարի գյուղի մոտ գտնվող Խորանաշատ վանքը 13-րդ դարի, որը չէր գործում, քանի որ ճանապարհը վտանգավոր էր, այսուհետ կբացվի, համեմատաբար ապահով կլինի։ Այլևս ՀՀ զինուժն է ճանապարհը վերահսկում»,– գրել է նա։Պաշտպանության նախարարությունն այս լուրերն առայժմ չի մեկնաբանում։Իսկ ՀՀ ՊՆ մամուլի քարտուղար Արծրուն Հովհաննիսյանը քիչ առաջ իր Facebook-յան էջում գրել է. «ՀՀ ԶՈւ-երը ամեն րոպե աշխատում են, մշտական զգոն են, սակայն ՀՀ ՊՆ-ը չի ուզում շատ բարձրաձայնել և ինչպես միշտ գերադասում է լինել զուսպ։ Դիրքերի բարելավումը մշտական գործընթաց է՝ Փառք Հայոց Բանակին»։
Հայկական զինուժն ամրացրել է նոր հենակետ, որից անհրաժեշտության դեպքում կարող է սաստել ադրբեջանական կողմի ոտնձգությունները, որոնք այս տարածքում բավական հաճախ էին գրանցվում։
Ի դեպ, հենց այդ մասում է գտնվում Խորանաշատի վանքը, որը տարիներ շարունակ փակ էր գյուղացիների համար։
Դեպի վանք տանող ճանապարհը վերահսկվում էր դրանից վեր տեղակայված ադրբեջանական զինուժի կողմից։ Եկեղեցի գնացող գյուղացիները հայտնվում էին հակառակորդի նշանառության տակ։Ճիշտ է, խիզախ հավատացյալներ լինում էին, ովքեր գիշերով բարձրանում էին այստեղ` իրենց աղոթքն առ Աստված հնչեցնելու, ու իրենց այցելության մասին համագյուղացիներին պատմում էին գիշերը եկեղեցում արված լուսանկարները ցույց տալով։Խորանաշատը Վանական համալիր է, որի գլխավոր եկեղեցին՝ Սուրբ Աստվածածինը թվագրվում է 1211-1222 թթ-ով: Խորանաշատը եղել է միջնադարյան Հայաստանի ամենանշանավոր կրթական, գիտամշակութային ու աստվածաբանական կենտրոններից մեկը։Եկեղեցին վերահսկող ադրբեջանական դիրքից ուղիղ նշանառության տակ էր նաև Չինարի գյուղի գրեթե ողջ տարածքը, այդ թվում` դպրոցն ու մանկապարտեզը, որոնց հրետակոծություններն այստեղ հազվադեպ չէին։Տարիների ընթացքում գյուղում նաև ադրբեջանցի դիպուկահարների կրակոցներից գյուղացիների վիրավորումների ու սպանության բազում դեպքեր են գրանցվել ։
