«ՀՀ նախագահը պարբերաբար խախտում է Սահմանադրությունը» հրապարակման վերաբերյալ ներկայացնում ենք Հանրապետության նախագահի աշխատակազմի հասարակայնության հետ կապերի վարչության պարզաբանումը.
«Սահմանադրության 166-րդ հոդվածի համաձայն՝ Հանրապետության նախագահի լիազորությունն է Ազգային ժողովի ընտրությանը առաջադրել Սահմանադրական դատարանի դատավորի թեկնածու: Վերոնշյալ լիազորությունն իրականացնելու համար ժամանակավոր խորհրդակցական աշխատանքային խումբ ստեղծելու կամ դրա վերաբերյալ համապատասխան կարգադրություն ընդունելու մասով որևէ իրավական սահմանափակում առկա չէ: Հավակնորդների կողմից փաստաթղթերի ներկայացման և քննարկման հրապարակային կարգի կիրառումը Հանրապետության նախագահն անհրաժեշտ է համարում իր լիազորությունը թափանցիկ իրականացնելու նպատակով:
Ցանկանում ենք հաստատել, որ Հանրապետության նախագահն իր վերոնշյալ սահմանադրական լիազորությունն իրականացնում է դրա սահմանադրական նպատակներին և Սահմանադրության պահանջներին համապատասխան:
Հանրապետության նախագահը, որպես պետության գլուխ, հետևում է Սահմանադրության պահպանմանը, իր լիազորություններն իրականացնելիս անաչառ է և առաջնորդվում է բացառապես համապետական ու համազգային շահերով»:
ՀՀ նախագահի աշխատակազմ
