Սեպտեմբերին Կառավարությունը կքննարկի «Տարածքային կառավարման մասին» օրենքում փոփոխություններ կատարելու մասին նախագիծը, որին կհաջորդի մարզպետարանների օպտիմալացման գործընթացը:
Մարզպետարանների օպտիմալացման գործընթացը շուտով կմեկնարկի։ Այդ մասին այսօր Գյումրիում լրագրողների հետ ճեպազրույցում ասաց Տարածքային կառավարման և ենթակառուցվածքների նախարար Սուրեն Պապիկյանը:
«Օպտիմալացման ծրագիրն արդեն պատրաստ է: Դա կլինի օրենքին համապատասխան՝ մարդիկ 2 ամիս առաջ կծանուցվեն և արդեն մրցութային կարգով կհամալրվի նոր հաստիքացուցակը` տվյալ մարզի պահանջներին համապատասխան»,-նշեց նախարարը:
Նրա խոսքով` առաջիկայում ՀՀ Տարածքային կառավարման և ենթակառուցվածքների նախարարության կողմից կներկայացվի «Տարածքային կառավարման մասին» օրենքում փոփոխություններ կատարելու մասին նախագիծ: Նախագիծը կառավարության հաստատմանը կներկայացվի սեպտեմբերին, որին կհաջորդի մարզպետարանների օպտիմալացման գործընթացը:
Նշենք, որ մարզպետարանների օպտիմալացման մասին խոսակցություններն սկսվեցին դեռևս նախորդ տարվանից` կառավարության կառուցվածքային բարեփոխումների համատեքստում։ Այդ փոփոխությունների հետևանքով Հայաստանում գործող 17 նախարարություններից 5-ը օպտիմալացվեցին։
Աղբյուրը armeniasputnik.am