«Հայաստան» խմբակցության պատգամավոր, «Վերածնվող Հայաստան» կուսակցության նախագահ Վահե Հակոբյանը հայտարարեց, որ բերման են ենթարկել ՀՀ երկրորդ նախագահ Ռոբերտ Քոչարյանի որդուն՝ Լևոն Քոչարյանին, ով իրենց հետ մասնակցում էր բողոքի ակցիայի։
«Մենք փողոց փակեցինք, սակայն այդ ժամանակ ոստիկանները չեկան, այնուհետև քայլում էինք դեպի ներքև։ Ոստիկանները հատուկ եկան մի քանի հոգու տանելու։ Իջան մեքենայից ու վազեցին դեպի Լևոն Քոչարյանը։ Իմ երկու օգնականներին են բերման ենթարկել, մի շարք ընկերների, մի մասը նաև Եվրոպայից էին ժամանել։ Մենք երևի մի 100 հոգի կլինեինք, իրենք 300»,- լրագրողներին պատմեց Վահե Հակոբյանը։
Նրա խոսքով, կան հատուկենտ ոստիկաններ, ովքեր ատելությամբ են լցված քաղաքացիների նկատմամբ, թե ինչով է դա բացատրվում, որտեղից է գալիս այդ ատելությունը, դժվարանում է ասել։ Վահե Հակոբյանն առաջարկում է, եթե ամեն ինչ հաջողվի, այդ ոստիկաններին ուղարկել Սև լիճ, «թող գնան, թուրքերին վռնդեն Սև լճից»։
