BBC-ի ռուսական ծառայությունն անդրադարձել է Հայաստանում օրեր շարունակվող բողոքի ակցիաներին։ Ըստ աղբյուրի, Երևանում ընթանում են ամենազանգվածային փողոցային բողոքի ակցիաները, որոնց մասնակիցները պահանջում են «առանց Նիկոլ Հայաստան»։
Մայիսի 2-ին բերման է ենթարկվել 189 մարդ, մայիսի 3-ին՝ 237 մարդ։
«Բողոքի ակցիաները սկսեցին ապրիլի վերջից, երբ վարչապետ Փաշինյանը հայտարարեց, որ Ղարաբաղի հարցը տարածքային չէ։ Ընդդիմությունը հայտարարել է, որ բողոքի ակցիաները կշարունակվեն այնքան ժամանակ, քանի դեռ կառավարությունը հրաժարական չի տվել»,-գրում է աղբյուրը։
«Հայրենիք» կուսակցության նախագահ Արթուր Վանեցյանը ԶԼՄ-ին տված հարցազրույցում հույս է հայտնել, որ բողոքի ակցիաներում կընդգրկվեն ավելի շատ մարդիկ, և ճնշման ներքո Նիկոլ Փաշինյանը կգնա։
Ընդդիմությունը Փաշինյանի հայտարարությունից հետո պնդում է, որ վերջինը պատրաստվում է զիջումների գնալ Ղարաբաղի հարցում։
«Նիկոլ Փաշինյանը չունի իրավունք վաճառելու Արցախի հարցը, մեր ազգային շահերը, Ցեղասպանության միջազգային ճանաչումը ոչ մի մայրաքաղաքում՝ ոչ Փարիզում, ոչ Մոսկվայում, ոչ Բրյուսելում։ Փաշինյանը ներկայացնում է թուրքաադրբեջանական շահերը, ոչ թե հայ ժողովրդի շահերը, ապացույցները բազմաթիվ են»,-ասել է ՀՀԿ փոխնախագահ Արմեն Աշոտյանը։
