ԱՄՆ Կոնգրեսի Ներկայացուցիչների պալատը հավանություն է տվել Ուկրաինային աննախադեպ գումարի չափով օգնության լրացուցիչ փաթեթին, որը կազմում է գրեթե 40 միլիարդ դոլար՝ համաձայն քվեարկության արդյունքների, գրում է «Ռիա Նովոստի» գործակալությունը։
Անցած շաբաթ ԱՄՆ նախագահ Ջո Բայդենը հայտարարել էր Կիևին լրացուցիչ գումար տրամադրելու մասի։ Այդ ժամանակ էլ նա հիշեցրել է, որ Կոնգրեսի կողմից նման օգնության համար հատկացված միջոցները գործնականում սպառվել են, և օրենսդիրներին կոչ է արել «անհապաղ» հաստատել Ուկրաինային նոր՝ 33 միլիարդ դոլար տրամադրելու ավելի վաղ իր վարչակազմի կողմից ուղարկված խնդրանքը։
Ընդ որում, ինչպես ավելի վաղ գրել էին ամերիկյան խոշոր ԶԼՄ-ները, ներքին քննարկումների արդյունքում Կոնգրեսի առաջնորդները պայմանավորվածություն են ձեռք բերել 39,8 մլրդ դոլար հատկացնել Ուկրաինային, ինչը գրեթե յոթ միլիարդով գերազանցում է ԱՄՆ-ի նախագահի պահանջած միջոցների ծավալը:
Տարբեր հրապարակումների համաձայն՝ ընդլայնված փաթեթը ներառում է հավելյալ 3,4 միլիարդ ռազմական օգնության եւ նույնքան էլ՝ մարդասիրական օգնության համար։
