Թերթը շրջայց է կատարել և պարզել, թե վերջին շրջանում որքան են թանկացել բենզինն ու գազը։
«Ժողովուրդ» օրաթերթը գրում է, որ Հայաստանում նոր բունտ է հասունանում վարորդների շրջանում. արդեն մի քանի օր է՝ բարձրանում են և՛ բենզինի, և՛ բնական սեղմված, և՛ հեղուկ գազի գները։
Թերթը շրջայցի ընթացքում պարզել է, որ ռեգուլյար տեսակի բենզինի մեկ լիտրը 350 դրամից բարձրացել է՝ դառնալով 370 դրամ, հեղուկ գազի մեկ լիտրը թանկացել է 10 դրամով՝ 180-ից դարձել է 190 դրամ։ Իսկ ահա բնական սեղմված գազի մեկ կիլոգրամը գազալցակայաններում այժմ վաճառվում է միջինը 320-330 դրամով։
«Ի դեպ, այս տարվա ընթացքում բնական սեղմված գազի գինն արդեն երկրորդ անգամ է բարձրանում։ Կհիշեք՝ հուլիսի 19-ից գազի գինը Հայաստանում խոշոր սպառողների համար բարձրացավ, ինչի արդյունքում գազալցակայաններում բնական սեղմված մեկ կիլոգրամը դարձավ 310 դրամ»,– գրում է պարբերականը։
Երևանյան գազալցակայաններից մեկի աշխատակիցը «Ժողովուրդ» օրաթերթի հետ զրույցում բնական սեղմված գազի գնի թանկացումը կապել է դոլարի փոխարժեքի բարձրացման հետ. «Դոլարի փոխարժեքն է թելադրում, որովհետև գազի ձեռքբերման գինը խիստ կապված է դոլարի փոխարժեքի հետ, 10 տոկոս արդեն փոխարժեքի բարձրացում է տեղի ունեցել, այս դեպքում գազի գինը չէր կարող նույնը մնալ»։
Նա հույս է հայտնել, որ եթե արտարժույթը վերադառնա հին գներին, գազն էլ կէժանանա։
