Հայաստանի Բարձրագույն խմբի առաջնության համար տարին ավարտված է: Բոլորիս կողմից սիրված առաջնությունը «խորը քուն» է մտնում և կվերադառնա փետրվարի վերջին:
Ամփոփում ենք թիմերի ելույթները աշնանային հատվածում: Սկսում ենք նորաթուխ առաջատար «Լոռիից»:
«Լոռի». 15 հանդիպում, 8 հաղթանակ, 4 ոչ-ոքի, 3 պարտություն
Վանաձորյան թիմն ընթացիկ առաջնության դեռևս ամենաքիչ պարտություն կրած թիմն է: «Լոռին» սեպտեմբերին 2 անընդմեջ պարտություններից հետո («Արարատից» և «Փյունիկից») մրցակցին զիջել է նաև նոյեմբերի վերջին («Ուրարտուից»). մյուս բոլոր խաղերում «Լոռին» կամ հաղթել է, կամ ոչ-ոքի խաղացել:
«Լոռիին» է պատկանում ընթացիկ առաջնության դեռևս ամենախոշոր հաշիվը՝ 8:0. հենց այս հաշվով թիմը հաղթել է «Երևանին»: Իսկ ընթացիկ առաջնության առաջին պենտատրիկը հեղինակել է վանաձորյան թիմի հարձակվող և նախորդ առաջնության լավագույն ռմբարկու Ջոնել Դեսիրեն:
Մարզչի գործոնը
Տարվա սկզբին «Լոռիի» մարզչական ղեկը ստանձնել է իսպանացի Դավիդ Կամպանյան: Նրա և շտաբի շնորհիվ թիմը շատ կոմպակտ տեսք ունի: Առաջատարության հիմնական բաղադրիչներից մեկը հենց Կամպանյայի գործոնն է:
Առաջնային հատկանիշներից մեկն այն է, որ թիմը չի «կոտրվում» ամենակարևոր պահերին: Թիմը ունի կամային հզոր հատկանիշներ, որոնք կարողանում է գործածել անհրաժեշտ պահերին: Փաստ է, որ Կամպանյայի գործունեությունը ուղիղ և անուղղակի առումներով նպաստում են հայկական ֆուտբոլի զարգացմանը: Եթե ավելի վաղ նշվում էր, որ «Լոռին» կազմավորված է բացառապես լեգիոներներից և հայ ֆուտբոլիստների համար հնարավորություններ չկան, ապա այժմ պատկերը բավականին փոխվել է:
Կազմը
Այն, որ լեգիոներներն են թիմի «տոն տվող» ֆուտբոլիստները, դա փաստ է և որևէ փոփոխության չի ենթարկվել: Ջոնել Դեսիրեն վերադառնում է կրակոտ ֆուտբոլին և պատրաստ է դառնալ «Լոռիի» ծանր հրետանին: Մինչև «Երևանի» հետ հանդիպումը նա 5 գոլ էր խփել, նույքան էլ խփեց մեկ խաղում՝ ձեռնոց նետելով ռմբարկուական մրցավազքի առաջատար Մորի Կոնեին:
Մեծ սպասումներ կան երիտասարդներ Ռոբերտ Մինասյանից և Գրիգոր Աղեկյանից: Վերջինս շատ լավ էր մեկնարկել. բելառուսական «Իսլոչից» վերադարձած Գրիգորը 8 ոչ ամբողջական խաղերում 3 գոլ է խփել: Երկու գոլ էլ խփել է Ռոբերտը: Աղեկյանը և Մինասյանը մասնակցած բոլոր 8 հանդիպումներում համապատասպանաբար ընդամենը 140 և 153 րոպե խաղաժամանակ են ստացել:
Իսկական բացահայտում է դարպասապահ Վարդան Շահատունին. 21-ամյա Վարդանը 15 հանդիպումներից 13-ին մասնակցել է՝ բաց թողնելով 13 գոլ. այս արդյունքը երիտասարդ դարպասապահի համար կարող ենք համարել լավ: Շահատունին ամրապնդվել է «1-ին համարի» դիրքում և մրցակցությունից դուրս է թողել բրազիլացի Բրունո Սանթոսին:
Ուրախալի է, որ «Լոռիի» հիմնական կազմում անփոփոխ է փորձառու պաշտպան Արթուր Ավագյանի տեղը. նա նաև վանաձորյան թիմի ավագն է: Ավագյանը, բացառությամբ մեկի, բոլոր հանդիպումներին մասնակցել է, խփել է նաև մեկ գոլ: «Լոռի» վերադարձած 19-ամյա Դավիթ Փարեմուզյանը դեռևս շատ քիչ է խաղալու հնարավորություն ստանում. հեռանկարային ֆուտբոլիստը երկու անգամ փոխարինման է մտել:
Հայաստանի Գավաթ
Երկրի Գավաթի նախորդ եզրափակչի մասնակիցը դուրս է մնացել ընթացիկ խաղարկությունից: «Լոռին» միակ թիմն էր, որն առանց հանդիպում անցկացնելու դուրս եկավ քառորդ եզրափակիչ, քանի որ մրցակից «Դիլիջանը» հրաժարվել էր հանդիպումից: 1/4 եզրափակչում «Լոռին» նվազագույն հաշվով զիջել է «Ուրարտուին»: Սա էլ փաստում է այն մասին, որ Կամպանյայի և իր թիմի ամբողջ ուժերը կենտրոնացած են առաջնության վրա:
Հայկական ֆուտբոլին մեծ օգուտ տվող թիմը
Սեպտեմբերին «Լոռին» իսկական իրարանցում էր առաջացրել: Նախ Նանա Կվամեն տեղափոխվեց «Լիլ», ապա Իսա Ալիյուն՝ «Ալմերիա»: Սա էականորեն բարձրացրեց հայկական ֆուտբոլի հարգը: Տրանսֆերային առաջիկա պատուհանի ընթացքում «Լոռին» դարձյալ ակտիվ է լինելու:
Բացի այդ հանգամանքը կա ևս մեկ կարևոր կետ: Վանաձորում «Լոռիի» հանդիպումները սպասված են, երկրպագուների թիվը մեծ է: Այո, եղավ մեկ անախորժություն՝ կապված տրիբունաներում բախման հետ, բայց ֆուտբոլը չի կարող դրանից անմասն լինել: «Լոռիի» շնորհիվ Վանաձորը ֆուտբոլային հմայք է ստացել, և այստեղ երկու կարծիք լինել չի կարող:
Պայքարը
Այն, որ «Լոռին» իրական պայքար է մղելու չեմպիոնության համար, արդեն իսկ փաստ է: Գրեթե որևէ շանս չկա, որ «Լոռին» դուրս կմնա վեցնյակից, քանի որ 7-րդ տեղի «Փյունիկի» հետ միավորների տարբերությունը 8 է:
Հավելենք, որ առաջնության հիմնական փուլի վերջին 3 հանդիպումներում «Լոռիի» մրցակիցներն են «Ուրարտուն», «Արարատը» և «Շիրակը»:
