Քաղաքն ալեկոծվում է աղբի մեջ, առնետներն արդեն բուն են դրել մեր մուտքերում, «երևանցիները» դեռ լուռ են…

Սամվել Ֆարմանյանն իր էջում գրում է.

«Նրանք դեռ լուռ են…

Երևանը միայն շենք ու փողոց չէ, կյանք ու քաղցր հիշողություններ չէ: Երևանը առաջին հերթին երևանցիներն են: Նրանք, ովքեր ծնվել են այս լուսավոր, բարի ու գեղեցիկ քաղաքում: Ու շատ շատերը, ում համար Երևանը դարձել է իրենց երկրորդ ծննդավայրը, ովքեր ինձ նման հենց Երևանին են պարտական համարյա ամեն ինչի համար` բարձրագույն կրթությունից մինչև կյանքի հրաշալի ուղեկից ու ջերմ հիշողություններ:

Քաղաքներն էդպիսի ֆենոմեն ունեն. կան մարդիկ, ում կերպարում ժամանակը խտացնում է քաղաքը, նրա երեկն ու էսօրը: Դա է պատճառը, որ փողոցում, սրճարաններում ու էկրաններին նրանց տեսնելիս մենք Երևանի հանդեպ մեր սերն էլ ենք համեմում նրանց հանեպ մեր ունեցած զգացմունքներում: Դա է պատճառը, որ նրանք մեր մտքերում ու սրտերում հենց քաղաքն են, մեր Երևանն են:

Ու էսօր, երբ քաղաքն ալեկոծվում է աղբի մեջ, իսկ առնետներն արդեն բուն են դրել մեր մուտքերում ու բակերում, նրանք` «երևանցիները» դեռ լուռ են: Անուններ չեմ տալիս: Նրանց մենք բոլորս էլ գիտենք անուն առ անուն: Նրանք բոլորը մեր սրտերում են, մեր գեղեցիկ հիշողությունների ու զգացմունքների մի պատառն են: Նրանցից ոմանք իմ նաև ավագ ընկերներն են:

Բայց նրանք դեռ լուռ են»: