Երբ տեսնեմ, որ աշխատանքի արդյունավետությունը բարձրացնելու միջոցները սպառված են և պետք է ինչ–որ մեկին ազատեմ աշխատանքից, ապա կազատեմ. այս մասին իր գործունեության մեկ տարին ամփոփող մամուլի ասուլիսի ժամանակ հայտարարեց վարչապետ Նիկոլ Փաշինյանը՝ անդրադառնալով հարցին, թե ինչ չափորոշիչներով է ընտրում կադրերին:
Լրագրողը վարչապետին հիշեցրեց, որ վերջինս հայտարարել էր, թե պետք է դիվանագիտական կորպուսում աշխատեն պրոֆեսիոնալները և մարդիկ, որոնք համապատասխանում են միջազգային չափորոշիչներին, մինչդեռ կա զուգահեռ իրականություն, որտեղ նախկին իշխանությունների օրոք նշանակված կադրեր, օրինակ` Գեղամ Ղարիբջանյանը Արտաշես Թումանյանը պաշտոնավարում են և հարցին նրանք պրոֆեսիոնալ են թե՞ ոչ:
Լրագրողը նաև հիշեցրեց, որ վարչապետը մաքսատան աշխատակցին ասաց, որ դիմում գրի և դուրս գա աշխատանքից, մինչդեռ Քաղաքացիական ավիացիայի պետ Տաթևիկ Ռևազյանը լատինատառ է շփվում աշխատակիցների հետ։ Դիտարկմանը վարչապետն արձագանքեց. «Հայաստանի կեսը մյուս կեսի հետ լատինատառ է շփվում: Ռևազյանի հետ ես նամակագրության մեջ եմ և ոչ մի անգամ ինձ լատինատառ նամակ չի գրել, եթե տեղյակ եք, ինձ ցույց տվեք այդ լատինատառ նամակը, ես կհասկանամ, թե ինչ է»:
Վարչապետը մեկ այլ օրինակ բերեց. «Էլի օրինակ բերեմ, ասում էին, թե Հակոբ Արշակյանին ասել է՝ փետրվարի 30: Ժողովո՛ւրդ, մենք հասկանո՞ւմ ենք՝ ինչի մասին ենք խոսում: Ասենք՝ ի՞նչ: Մարդը կարող է ինչ-որ թվի չտիրապետի: Այսինքն ո՞ւմ ճաշակով պետք է առաջնորդվենք, չափանիշը ո՞րն է կադրեր նշանակելիս»:
Վարչապետը հարցրեց, հիմա Կատարում ՀՀ դեսպան Գեղամ Ղարիբջանյանն իր հետ քայլե՞լ է: «Այսինքն՝ ես հասկանում եմ այսպես՝ գործից ազատեմ նրանց, ովքեր ինձ հետ քայլել են, ազատեմ նրանց, ովքեր չեն քայլել, ազատեմ նրանց, ովքեր երիտասարդ են, ազատեմ նրանց, ովքեր տարիքով են»,- նշեց նա և հավելեց։
«Շատ հաճախ աղմուկ կա, ուզում եմ հասկանալ, թե տակն ինչ կա, հասկանում ես, որ ոչ մի բան էլ չկա: Ես ոչ մեկի հետ կապված կոմպլեքսներ չունեմ՝ քայլել են, թե չեն քայլել: Մի դեպքում էլ ասում են՝ էդ ո՞նց կլինի Դավիթ Սանասարյանն այդքան քայլեց հիմա քրեական գործ եք հարուցել, մյուս դեպքում ասում եք՝ քայլել է գործից չեք ազատում, մի դեպքում էլ՝ երիտասարդին ինչի՞ եք էս գործին նշանակել, մյուս դեպքում՝ տարիքը 70 տարեկան է ինչի՞ գործից չեք ազատում»: