Հայաստանի պաշտպանության նախկին նախարար, Հանրապետական կուսակցության առաջին փոխնախագահ Վիգեն Սարգսյանը մեկնում է Ամերիկայի Միացյալ Նահանգներ: Հանրապետական կուսակցության նախընտրական ցուցակը գլխավորած գործիչը Հայաստանից հեռանում է՝ ԱՄՆ-ում ուսանելու նպատակով։ Նրա ուսումնառությունը տևելու է մեկ տարի:
Տեղեկությունը Factor.am-ի հետ զրույցում հաստատել է նաև Վիգեն Սարգսյանը:«Այդ տեղեկությունները ճիշտ են, բայց ես մի քանի օրից այդ մասին հայտարարելու եմ»,- ասել է նա:
Վիգեն Սարգսյանը Իրավունքի և դիվանագիտության արվեստների մագիստրոս է: 1998-2000 թվականներին սովորել է ԱՄՆ-ի Իրավունքի և դիվանագիտության Ֆլետչեր դպրոցում, Թաֆթս և Հարվարդի համալսարաններում:
Կայքը Վիգեն Սարգսյանից հետաքրքրվել է՝ նույն մասնագիտությա՞մբ է շարունակելու հմտանալ, թե՝ այլ: «Այլ մասնագիտություն է, որի մասին առաջիկայում կհայտարարեմ»:
Հիշեցնենք, որ Վիգեն Սարգսյանը վերջին երկու խորհրդարանական ընտրություններում գլխավորում էր ՀՀԿ նախընտրական ցուցակը։ 2018 թվականի նոյեմբերից նա զբաղեցնում է «Լույս» հիմնադրամի գործադիր տնօրենի պաշտոնը:
Աղբյուրը՝ factor.am
