Աշխարհի գավաթ. Արոնյանն ու Մովսեսյանը հաջորդ փուլում են

Ռուսաստանի Խանտի Մանսիյսկ քաղաքում տեղի են ունեցել շախմատի աշխարհի գավաթի խաղարկության պատասխան հանդիպումները:

Առաջին շրջանի երկրորդ պարտիայում Լևոն Արոնյանը հաղթել է եգիպտացի Էլ Գինդի Էսամին և դուրս եկել հաջորդ շրջան: Առաջին պարտիայում գրանցվել էր ոչ ոքի: Արման Փաշիկյանն առաջին պարտիայում պարտվելուց հետո ոչ ոքի է խաղացել իրանցի Ալիռեզա Ֆիրուջայի հետ և լքել պայքարը:

Ռոբերտ Հովհաննիսյանը հաշտություն է կնքել ռուսաստանցի Անտոն Դեմչենկոյի հետ, սակայն առաջին պարտիայում կրած պարտության պատճառով լքել է մրցաշարը:

Սերգեյ Մովսեսյանը սևերով հաղթել է ռուսաստանցի Գրիգորի Օպարինին և դուրս եկել հաջորդ շրջան:

tert.am