ԱՄՆ բնակիչների մեծ մասը կարծում է, որ երկրում իրավիճակը դուրս է եկել վերահսկողությունից, գրում է հեղինակավոր Forbes պարբերականը՝ հղում տալով The Wall Street Journal-ի և NBC News-ի հարցմանը։
Հարցման արդյունքների համաձայն՝ ամերիկացիների 80 տոկոսը կարծում է, որ երկրում իրավիճակն արդեն անվերահսկելի է, իսկ 15 տոկոսը հակառակ կարծիքին է։
Հայտնի է, որ հարցումն անցկացվել է կորոնավիրուսային համավարակի և Մինեապոլիսում աֆրոամերիկացի Ջորջ Ֆլոյդի սպանության հետ կապված զանգվածային բողոքի ցույցերի ֆոնին։
Տեղական իշխանություններն արդեն հայտարարել են, որ քաղաքի ոստիկանությունը լուծարվելու է, դրա փոխարեն հասարակական անվտանգության ապահովման նոր մոդել է գործելու։
«Մեզ վրա պարտավորություն ենք վերցրել վերացնել ոստիկանական այն գործունեությունը, որին ականատես ենք եղել Մինեապոլիսում, և հասարակական անվտանգության ապահովման նոր մոդել սահմանել»,- ասվում է հաղորդագրության մեջ։
Հիշեցնենք, որ Ջորջ Ֆլոյդ անունով սևամորթ իրավախախտի սպանությունը տեղի է ունեցել Մինեսոտա նահանգի Մինեապոլիս քաղաքում մայիսի 25-ին: Դրանից հետո ողջ երկրով մեկ օրեր շարունակ չէին դադարում բողոքի ցույցերը: Մարդիկ պահանջում են խստագույնս դատապարտել ոստիկան Դերեկ Չաուվինին, որը, ծնկով սեղմած պահելով Ֆլոյդի պարանոցը, խեղդամահ է արել նրան, ինչպես նաև մյուս երեք ոստիկաններին, որոնք կանգնած են եղել դեպքի վայրում և ոչինչ չեն ձեռնարկել տղամարդուն փրկելու համար:
Ներկա պահին բոլոր չորս նախկին ոստիկաններին մեղադրանք է առաջադրվել:
Մի շարք քաղաքներում ցույցերը վերածվել են զանգվածային անկարգությունների, որոնց ընթացքում գողության, վանդալիզմի, հրկիզման դեպքեր են գրանցվել։ Բախումներ են տեղի ունեցել ոստիկանական ուժերի և ցուցարարների միջև:
Երկրում նաև կորոնավիրուսային իրավիճակն է խորանում․ այստեղ գրանցվել է վարակման ավելի քան 2 միլիոն դեպք, որից 112 471-ը՝ մահվան ելքով։
