ԱՄՆ Մինեսոտա նահանգի Վերին լճում հայտնաբերվել է «ուրվական նավ» անվանումը ստացած Hudson նավը, որը խորտակվել էր 1901 թվականին, գրում է Daily Mail-ը:
Աղբյուրի հաղորդմամբ՝ նավը գտել են դեռևս ամռանը՝ 250 մետր խորության վրա, սակայն այդ մասին հայտնի է դարձել միայն այժմ:
Կտավատով ու ցորենով բեռնված նավը Դուլութ նավահանգստից դուրս էր եկել 1901 թվականի սեպտեմբերի 15-ին, որից հետո հայտնվել էր ուժեղ փոթորկի մեջ և անհետացել էր:
Հաջորդ տասնամյակների ընթացքում տեղի բնակիչների շրջանում լուրեր էին պտտվում, թե նավը լճում լողում է որպես «ուրվական նավ»:
Hudson նավի բեկորները հայտնաբերել են խորտակված նավերի որոնմամբ զբաղվող Ջերի Էլիասոնը և Քրեյգ Սմիթը:
Աղետի ճշգրիտ վայրը և այլ մանրամասներ չեն հաղորդվում: