Արթուր Հակոբյանի եւ Սվետլանա Բոսնոյանի համար տարին սկսվելու է ուրախ իրադարձությամբ: Փետրվարին լոսանջելեսաբնակ ամուսինները ծնողներ կդառնան: Հաղորդավարուհին հայտնել է, որ դուստր են ունենալու:
«Շատ անհամբեր ենք, արդեն օրերն ենք հաշվում, թե երբ ենք ապրելու ծնող լինելու բերկրանքը: Քիչ մնաց մեր արքայադստեր լույս աշխարհ գալուն»,- նշել է ապագա մայրիկը եւ հավելել. «Երկուսիս համար էլ երեխային սեռը կարեւոր չէր. երազում ենք առողջ բալիկ ունենալու մասին»:
Առաջնեկի համար անհրաժեշտ գնումները զույգն արդեն կատարել է.«Այս մասին խոսելիս ամեն անգամ հուզվում եմ եւ ժպիտ է իջնում դեմքիս, որովհետեւ ամենաառաջին գնումը մեր ապագա բալիկի համար կատարել է Արթուրը, այն էլ Կանադայում կայացած ելույթից վերադառնալիս: Երբեք չեմ մոռանա ապրումներս, երբ ամուսինս ճամպրուկից հանեց նորածնի գուլպաներ եւ շապիկ: Հետո, իհարկե, շատ ավելի մեծ գնումներ արեցինք միասին, բայց այդ առաջինը յուրահատուկ էր: Ինքս շատ առիթ չեմ ունենում զբաղվել գնումներով, քանի որ մայրիկս այնքան է ոգեւորվել տատիկ դառնալու հանգամանքից, որ թվում է՝ մոլերի մանկական բաժիններն արդեն դատարկել է եւ նվիրել մեզ»:
Խոսելով աշխատանքից՝ Սվետլանա Բոսնոյանը նշել է.«2018-ից մեծ սպասումներ ունենք, եւ ոչ միայն անձնական, այլ նաեւ գործնական: Արթուրը շատ ակտիվորեն զբաղվելու է Լոս Անջելեսում կայանալիք իր մենահամերգին պատրաստվելով, ես էլ հեռուստատեսային նոր նախագծի մասնակցելու առաջարկ ունեմ, որն արդեն ընդունել եմ: Ճամփորդական նոր ձեւաչափի հաղորդում եմ վարելու»,-եզրափակել է նա:
Աղբյուրը՝ bravo.am
