Թուրքիայի արտգործնախարար Մևլութ Չավուշօղլուն Ադրբեջանի նախագահ Իլհամ Ալիևի հետ այսօր Բաքվում տեղի ունեցած հանդիպման ժամանակ հայտարարել է, որ Բաքու կայցելի Թուրքիայի պաշտպանության նախարար Հուլուսի Աքարը։ Այս մասին հաղորդում է РИА Новости լրատվական գործակալությունը։
«Ես այստեղ եմ եկել նախագահի հանձնարարությամբ։ Դուք նրա հետ խոսում եք ամեն օր, օրական առնվազն 2 անգամ, բայց ես փոխանցում եմ Ձեզ նրա բարևները։ Մենք նախագահից հանձնարարություն ենք ստացել Ադրբեջանին մենակ չթողնել այս գործընթացում, պարբերաբար այցելել Բաքու և գործել համատեղ։ Այստեղ կգան նաև մեր պաշտպանության նախարարը և այլ գործընկերներ։ Խորհրդարանի նախագահն այժմ այստեղ է գտնվում»,- Չավուշօղլուի խոսքը մեջբերվել է Ադրբեջանի նախագահի կայքում։
Այսպիսով, ևս մեկ անգամ հաստատվում է այն փաստը, որ Արցախի դեմ սանձազերծված ագրեսիայում Թուրքիան անմիջական մասնակցություն ունի։
