«Այս շաբաթվա ընթացքում ունենալու ենք շատ ուրախալի մի իրադարձություն». Զոհրաբ Մնացականյան

«Մենք խոսել ենք միջազգային օրակարգի տարբեր հարցերի շուրջ, ես առիթ ունեցա մանրամասնորեն ներկայացնել Արցախի հարցի խաղաղ կարգավորման գործընթացում Հայաստանի մոտեցումները, դիրքորոշումը, դիրքորոշումների տրամաբանությունը»,- այսօր լրագրողների հետ հանդիպմանն այս մասին Ուրուգվայի իր գործընկեր Ռոդոլֆո Նին Նովոայի հետ համատեղ ասուլիսի ժամանակ հայտարարեց ՀՀ ԱԳ նախարար Զոհրաբ Մնացականյանը:

«Վերահաստատեցի, որ Արցախի մեր հայրենակիցների անվտանգությունը եղել և մնում է գերակա հարցը մեր մոտեցումներում, և դրանից բխող ստատուսի հարցը մնում է գերակա հարց մեզ համար:Ես նշեցի, որ համապատասխան միջավայրը խաղաղ գործընթացն առաջ տանելու համար եղել և մնում է կարևորագույն հարց: Մանրամասնեցի, թե ինչ է նշանակում մեր մոտեցման մեջ այն, որ վերաբերում է այն հարցին, որ խաղաղ կարգավորումն այլընտրանք չունի: Շնորհակալ եմ իմ գործընկերոջն այն ընկալումների համար, որոնցով նա կիսվեց ինձ հետ այդ հարցի շուրջ»,- ասաց Զոհրաբ Մնացականյանը:Արտգործնախարարը նշեց, որ ներկայացրել է նաև Հայաստանի արտաքին քաղաքական գերակայությունները՝ տարբեր ուղղություններով, հայկական կողմի աշխատանքը տարբեր կազմակերպություններում, ինտեգրացիոն գործընթացներում.

«Նաև լսեցի Ուրուգվայի գերակայությունները ինտեգրացիոն գործընթացներում, որը նույնպես շրջանակ է մեզ համար աշխատելու երկկողմ օրակարգով: Վերահաստատեցինք, որ այն երկխոսությունը, որ ունենք, շարունակական է, այս շաբաթվա ընթացքում ունենալու ենք շատ ուրախալի մի իրադարձություն, երբ Երևանում կբացվի Ուրուգվայի գլխավոր հյուպատոսությունը»:

Աղբյուրը news.am