ԲՀԿ-ականները Գագիկ Ծառուկյանի հետ հոկտոմբերի 4-ին սովորական աշխատանքային հանդիպում են ունեցել, տարբեր հարցեր են քննարկել: Այս մասին «Հայկական ժամանակ»-ի հարցին ի պատասխան երեկ ասաց ԱԺ փոխնախագահ Միքայել Մելքումյանը: «Քանի որ Ծառուկյանը բացակայում էր երկրից, ներկուսակցական աշխատանքային հարցեր ենք քննարկել»
Այնուհանդերձ, նշենք, որ ԲՀԿ-ականներն այս թեման մեկնաբանելիս շատ զգուշավոր են: Անգամ հակասող հայտարարություններ են անում: Ծառուկյանի խոսնակ Իվետա Տոնոյանը տեղեկացրել էր, որ հանդիպման ժամանակ քննարկվելու է ԱԺ կանոնակարգում տեղի ունեցած փոփոխությունը, որին կողմ էր քվեարկել ԲՀԿ-ն: ՀԺ-ն Մելքումյանից հետաքրքրվեց, թե քվեարկությունը համաձայնեցրե՞լ էին Գագիկ Ծառուկյանի հետ: «Ո՞նց կարող է կուսակցության նախագահի հետ քվեարկությունը համաձայնեցված չլինի»:
ԲՀԿ-ից մեկ այլ պատգամավոր՝ Գեւորգ Պոտրոսյանն էլ մեր զրույցում նշեց, որ Գագիկ Ծառուկյանը որեւէ արտառոց բան չի տեսել այդ նախագծում: «Ծառուկյանին ներկայացրել ենք նախագծի էությունը: Նա տեղյակ է եղել, որ մենք նման նախագծի օգտին ենք քվեարկելու: Մեր կուսակցության ղեկավարը լիարժեքորեն վերահսկում է մեր կողմից կատարվող աշխատանքին»:
Տպավորություն է ստեղծվել, որ Գագիկ Ծառուկյանը շատ լավ իրազեկված է եղել նախագծի բովանդակությունից եւ այդ օրերին բացակայել է հանրապետությունից, որ թիմն ազատ քվեարկի: Մեր այս դիտարկման վերաբերյալ Գեւորգ Պետրոսյանն ասաց. «Երբեք Ծառուկյանն իր թիմին միայնակ չի թողել: Չկա նման բան, չգիտեմ, թե դա ինչից եք բխեցնում: Նա միշտ թիմի կողքին է, թիմը միշտ նրա կողքին է: Երբեք որեւէ մեկը չի կարող պնդել, թե Ծառուկյանը գիտե՝ ինչ պետք է քվեարկվեր, դրա համար միտումնավոր բացակայել է»:
Գագիկ Ծառուկյանի հետ հանդիպման ժամանակ եղել են միայն ԲՀԿ-ի քաղաքական թեւը ներկայացնող պատգամավորները: ԱԺ-ում պատգամավորները չկարողացան հիմնավորել, թե ինչու է նման կազմ ընտրվել: Լուիզա Սարգսյանը նշեց, որ իրեն չեն հրավիրել, բայց առաջիկայում խմբակցության ընդլայնված նիստ է լինելու: Նա միաժամանակ նշեց, որ ԲՀԿ քաղխորհրդի գլխավոր քարտուղար Նաիրա Զոհրաբյանը եւս չի մասնակցել, քանի որ երկրից դուրս է եղել: Գեւորգ Պետրոսյանը, թեեւ, պնդում էր, որ ինքն անձամբ է տեսել Նաիրա Զոհրաբյանին, քանի որ ինքն էլ է ներկա եղել: Ինքը՝ Զոհրաբյանը, կտրականապես հրաժարվեց խոսել Ծառուկյանի հետ հանդիպման եւ նրա հայտարարությունների մասին: Սակայն հանդիպման օրը՝ հոկտեմբերի 4-ին, ՀԺ-ին տեղեկացրել էր, որ Թբիլիսիում է: Տեղեկություններ կան, որ ԲՀԿ-ն պառակտման շեմին է, շուտով շատերն են լքելու կուսակցությունը, բայց ԲՀԿ-ականները բացառում են մնան հանգուցալուծումը: Մասնավորապես, Լուիզա Սարգսյանն ասաց. «Լարվածություն չկա, մենք մեր բնականոն աշխատանքը տանում ենք»:
ԲՀԿ-ականներից Նապոլեոն Ազիզյանը, որը եւս հաստատեց հանդիպմանը ներկա չլինելու մասին, միաժամանակ վստահեցրեց, որ ներսում լարվածություն չկա: «Մեր կուսակցության ներսում ոչ մի բան չի կարող կատարվել: Մի երազեք, երազում էլ անգամ չեք կարող տեսնել, որ ԲՀԿ-ն պառակտվում է»,- ասաց նա: Ավելին՝ Ազիզյանն ավելի քան վստահ է, որ արտահերթ ընտրությունների պարագայում էլ ԲՀԿ-ն լայն կազմով է խորհրդարանում ներկայանալու: Դիտարկմանը, որ վարչապետը նշում է՝ ով կողմ է եղել ԱԺ կանոնակարգի փոփոխությանը հակահեղափոխական է, Ազիզյանն արձագանքեց. «Մենք ինքնասպանության չենք գնացել, նման բան երազում կտեսնեք: Մենք հակահեղափոխական չենք»:
Պատգամավորը վստահ է, որ ԲՀԿ-ի համար տարբերություն չկա, թե երբ ընտրություններ կանցկացվեն: Սա հակասում է ԲՀԿ-ի մյուս պատգամավորների հայտարարություններին: «Ծիծաղս գալիս է, մեր համար ի՞նչ տարբերություն, թե երբ կլինի ընտրությունները: Գագիկ Ծառուկյանն ինչ ասել է, լրիվ ճիշտ է ասել: Ծառուկյանը հիմնվել է ժողովրդի կարծիքի վրա: ԲՀԿ-ի համար միեւնույն է, թե երբ կլինեն խորհրդարանական ընտրությունները»:
Սակայն, ընդգծենք, որ մինչեւ Գագիկ Ծառուկյանի հարցազրույցը ԲՀԿ-ականները հայտարարում էին՝ դեկտեմբերը ընտրությունների անցկացման համար լավագույն շրջանը չէ: Իսկ ահա Ծառուկյանն ասում է, որ, եթե ժողովուրդը ցանկանա, որ ընտրությունները պետք է լինեն դեկտեմբերին, ապա իրենք դեմ չեն: Թիմի ներկայացուցիչների եւ թիմի առաջնորդի հակասական հայտարարությունների վերաբերյալ Գեւորգ Պետրոսյանն ասաց. «Գագիկ Ծառուկյանը իր որոշումները կայացնելիս միշտ հաշվի է առնում ժողովրդի կարծիքը, բայց այդ նույն ժողովուրդը մեզ ուղարկել է ԱԺ եւ մենք հաստատել ենք կառավարության ծրագիրը, որով ընտրությունները պետք է անենք մեկ տարվա ընթացքում: Որեւէ հակասություն մի որոնեք: Մենք ասել ենք՝ երբ ԸՕ-ով պայմանները կապահովեք, այդ ժամանակ էլ կլինի ընտրություն: Դա կլինի մայիս, թե դեկտեմբեր ամիսը: Մենք շեշտը չենք դնում մայիսի վրա, մենք ավելորդ շտապողականություն կամ ավելորդ դանդաղկոտություն չենք ուզում դրսեւորել»:
Գեւորգ Պետրոսյանը բացառում է Նիկոլ Փաշինյանի հետ հուշագրի ստորագրումը՝ քանի դեռ Նիկոլ Փաշինյանն ու ԲՀԿ ղեկավարը չեն հանդիպել. «Մենք չգիտենք, թե վարչապետն ինչպիսի առաջարկով կարող է հանդես գալ, ինչպիսի մտադրություններ ունի: Ես անիմաստ եմ համարում գուշակություն անել: ԲՀԿ-ն միշտ էլ կողմ է եղել համաձայնեցված գործունեությանը»:
Միքայել Մելքումյանն էլ նշեց, որ Նիկոլ Փաշինյանի հետ իրենց քաղաքական ուժի խոսակցության ընթացքում քննարկվել են բոլոր տիպի սցենարները: Առաջին սցենարի համաձայն` պետք է ստորագրվի հուշագիր, որ վարչապետի թեկնածուների առաջադրումներ չեն լինելու, երկրորդ սցենարի համաձայն` հուշագիր չի ստորագրվելու, իսկ թե ինչ սցենար է, Մելքումյանը չմանրամասնեց: «Եղել է ընդամենը տեղեկության փոխանակում, երբ կլինեն վերջնական շփումներ, այդ դեպքում մեր վերջնական որոշումը կլինի: Մեր քաղաքական մարմնի որոշում դեռ չունենք, երբ կլինեն շփումներ, կհայտարարենք»:
Անդրադառնալով Ծառուկյանի վերջին հարցազրույցին՝ նշենք, որ նա քաղաքական ուշագրավ հայտարարություններով հանդես եկավ: Մասնավորապես, այն, որ առաջիկայում պատրաստվում է հանդիպել արտախորհրդարանական որոշ քաղաքական ուժերի հետ: ՀԺ-ն Գեւորգ Պետրոսյանից հետաքրքրվեց, թե որ ուժերի մասին է խոսքը: «Այն ուժերը, որոնք պարտավորված չեն այս կամ այն կողմից ղեկավարվեն, այլ ունեն մաքուր քաղաքական անցյալ եւ կարող են կատարել լուրջ քաղաքական որոշումներ: Այս պահին անուններ չեմ կարող ասել, մենք խմբակցությունում կքննարկենք, թե ինչ մասնագիտության տեր մարդկանցից սկսենք»:
2013 թվականին Ծառուկյանը եւս փորձեց մոբիլիզացնել ընդդիմադիր ուժերին, բայց վճռական պահին լքեց նրանց: Պատգամավորից հետաքրքրվեցինք՝ արդյո՞ք նման պահվածքից հետո լուրջ ուժերը կհամաձայնվեն Ծառուկյանի հետ քաղաքական գործընթացների մեջ մտնել: «Ցանկացած արտախորհրդարանական ուժ ինքը պետք է վերլուծի համագործակցության հնարավոր սպասելիքները: Եթե արտախորհրդարանական ուժը լսելու է Ծառուկյանի ծրագիրը, բայց ձեռնպահ է մնալո՝ւ հաշվի առնելով ձեր նշած դեպքերը, ուրեմն, Աստված հաջողություն տա նրանց»:
Գագիկ Ծառուկյանը «Կենտրոն»-ին տված հարցազրույցում ասել էր, որ աջակցել է հեղափոխությանը: Սերժ Սարգսյանը իր հայտարարությունից հետո է հրաժարական տվե,լ եւ նա դա Ծառուկյանի կողմից որակել է «մեջքից խփել»: Այս հայտարարությունների համատեքստում Գեւորգ Պետրոսյանից հետաքրքրվեցինք՝ եթե Ծառուկյանն ընդդիմադիր էր, ապա ինչու էր նրա թիմը կողմ Սարգսյանի վարչապետությանը: Ինչպես նաեւ ԲՀԿ-ն կողմ է եղել ՀՀԿ-ի նախագահի թեկնածուին, քվեարկել բոլոր այն նախագծերի օգտին, որոնք չէին կարող ընդունվել ՀՀԿ-ի պարզ մեծամասնության միջոցով: «Պատգամավորները կաշկանդված չեն իրենց մանդատով: Ձեր նշած քվեարկությունների ժամանակ Ծառուկյանի կողմից հստակ պահանջ չի եղել, որ կողմ լինեն: Սրան զուգահեռ էլ Ծառուկյանը իր թիմով աջակցել է հեղափոխությանը, հակառակ դեպքում Փաշինյանը չէր լինի: Կանոնակարգում փոփոխություն անելու քվեարկության օրը ժողովուրդը հավաքված էր ԱԺ-ի մոտ, եթե մենք Փաշինյանի օգտին ժողովրդից վախենալով էինք քվեարկել, բա այդ դեպքում ինչու՞ այդ օրը չվախեցանք ու հետ քայլ չարեցինք: Այս քվեարկությամբ ես եւ իմ թիմակիցները փորձել ենք ցրել այն շինծու մեղադրանքը, թե վարչապետի թեկնածությանը կողմ ենք եղել ժողովրդի ճնշումների պատճառով»:
Հիշեցնենք ընդամենը, որ ԲՀԿ-ն հեղափոխությանը միացավ, երբ արդեն հստակ տեղեկություն կար, որ Սերժ Սարգսյանի հրաժարականի դիմումը գրված է:
