Քոչարյանը թուրքից չի փախել, ձեզնից ո՞ւր պիտի փախչեր. Էդուարդ Շարմազանով

ՀՀԿ խոսնակ Էդուարդ Շարմազանովը ոչ թե արդարադատության՝այլ հեղկոմի ձեռագիր է տեսնում  ներկա իշխանության  գործողություններում:

«Կառավարությունը հին ձեռքբերումների շարունակականությունն է ապահովում ու վատը թողնում է անցյալում: Իսկ հեղկոմը քանդում և մերժում է իրենից առաջ եղածը:  Դժբախտաբար ես հիմա տեսնում եմ ավելի շատ հեղկոմի ՝ այլ ոչ թե կառավարության ձեռագիր»,- այս օրերին տեղի ունեցողն այսպես է բնութագրում  ՀՀԿ խոսնակ Էդուարդ Շարմազանովը ՝ Dialogue.am -ի հետ զրույցում:

Մասնավորապես  ՀՀ երկրորդ նախագահին՝ երեկ  մարտի 1-ի գործով  ՀՔԾ կամավոր ներկյանալուց հետո    կալանավորման միջնորդություն  ներկայացնելու  մասին որոշման հիմքում ՀՀԿ խոսնակը  տեսնում է  անձնական վրեժնդրության միտումներ:

Մեր այն դիտարկմանը, որ ՀՀ Սահմանադրության 140 հոդվածի համաձայն՝  Հանրապետության նախագահն իր լիազորությունների ժամկետում և դրանից հետո չի կարող հետապնդվել և պատասխանատվության ենթարկվել իր կարգավիճակից բխող գործողությունների համար: Հետևապես 2008 թ-ի մարտի 1-2-ին Ռոբերտ Քոչարյանի գործողություններն   «իր լիազորությունների ժամկետո՞ւմ» են եղել եւ բխե՞լ են արդյոք «իր կարգավիճակից» հարցին պարոն Շարմազանովն ահա սյպես արձագանքեց.

-Իրավական հարցերին երբեք չեմ տվել գնահատական ու փորձել եմ չշտապել, բայց ինչպես ասում են՝ երբեք մի ասա երբեք:

Անձնական վրեժխնդրության միտումներն ու մոտեցումները վտանգավոր են մեր պետության համար, մի պետության, որի գլխավոր  մարտահրավերը Արցախն է. նեոբոլշևիզմի կառուցումը կարող է կործանարար լինել:

Եթե երկրորդ նախագահը արտերկրից վերադառնում է ու կավամոր ներկայանում է Հատուկ քննչական ծառայություն, ուրեմն ո՞րն է նրան  անմիջապես  կալանավորելու միջնորդություն ներկայացնելու տրամաբանությունը:

Մենք պարտավոր ենք հաշվի նստել այն իրավիճակի հետ, որ անվտանգության արտաքին մարտահրավերներ ունեցող երկիր ենք,  այդ դեպքում նեոբոլշեվիկյան ու  «ինձնից առաջ բոլորը հանցագործ են» տրամաբանությամբ մինչև ու՞ր ենք հասնելու:

Քոչարյանը թուրքից չի փախել, ձեզնից ու՞ր պիտի փախչեր, որ շտապում էիք ամեն դեպքում կալանավորելու միջնորդություն ներկայացնել:

Սա վտանգավոր է , ու շատ…մենք իրավունք չունենք վրեժխնդրության գետը մտնել: Սա կործանարար կարող է լինել բոլորիս համար..  անխտիր բոլորիս…

Աղբյուրը՝ dialogue.am