Ցանկություն ունեմ եւ մտածում եմ այդ ուղղությամբ. Վանեցյանը՝ ՀՖՖ նախագահ դառնալու մասին

ԱԱԾ տնօրեն Արթուր Վանեցյանը կառավարության նիստից առաջ լրագրողների հետ զրույցում նշեց, որ ցանկություն ունի ղեկավարել Հայաստանի ֆուտբոլի ֆեդերացիան:

«Չեմ ասի, թե կհրաժարվեմ, առաջիկա օրերին կքննարկենք։ Եթե որոշեմ առաջադրվել, կհայտարարեմ: Պատրաստ եմ առաջադրվել միայն այն դեպքում, երբ այսօրվա ֆուտբոլի աշխարհի մեր ներկայացուցիչներն ինձ հավաստիացնեն, որ իրենք էլ դեմ չեն, որ ես լինեմ ՀՖՖ նախագահ»,- մասնավորապես, ասաց նա։

Նա նշեց, որ ֆուտբոլասեր է: «Հայկական ժամանակ»-ի հարցին ի պատասխան էլ ասաց, որ աշխարհի առաջնության խաղերին երկրպագել է Ֆրանսիային, որը դարձավ Աշխարհի 2018 թվականի չեմպիոն:

Դիտարկմանը, որ պետք է տարանջատել ֆուտբոլն ու քաղաքականությունը, Վանեցյանը պատասխանեց. «Ես քաղաքականությամբ չեմ զբաղվում»: ԱԱԾ տնօրենն ասաց, որ հանդիպել է ՀՖՖ նախագահ Ռուբեն Հայրապետյանի հետ:

Լրագրողի  հարցին՝ Հայաստանի հավաքականի երկրպագուները ՀՖՖ նախագահի պաշտոնում տեսնում են Յուրի Ջորկայեֆին, պատրա՞ստ է զիջումների գնալ, Արթուր Վանեցյանը պատասխանեց, որ պատրաստ է: ՀՖՖ գործկոմի կազմում են Տարոն Մարգարյանը, Հրայր Թովմասյանն ու շատ ՀՀԿ-ականներ: Վանեցյանը անդրադառնալով այս փաստին նշեց. «Գործկոմի կազմն ամբողջությամբ փոխվելու է»:

Վանեցյանը հիշեցրեց, որ ՀՖՖ նախագահի առաջադրումը պետք է անեն ֆուտբոլային բարձր լիգայում խաղացող ակումբները։ «Չեմ թաքցնի, ցանկություն ունեմ եւ մտածում եմ այդ ուղղությամբ»,- ասաց Վանեցյանը եւ ավելացրեց.

«Եթե ակումբները որպես միասնական թեկնածու որոշեն առաջադրել ինձ, ես մեծ սիրով կընդունեմ»,- ասաց նա։

Իսկ մինչ այդ նա կոչ արեց հայաստանյան բոլոր թիմերին մասնակցել Հայաստանի ֆուտբոլի առաջնությանը` անկախ այն հանգամանքից, թե ինչ հարաբերությունների մեջ են ՀՖՖ նախագահ Ռուբեն Հայրապետյանի հետ։

Հիշեցնենք` հուլիսի 17-ին ՀՖՖ նախագահ Ռուբեն Հայրապետյանը հայտարարել էր, որ սեպտեմբերին ինքը չի առաջադրվի ֆեդերացիայի նախագահի պաշտոնում, եթե առաջադրվի Արթուր Վանեցյանը։

Աղբյուրը՝ armtimes.com