Նիկոլ Փաշինյանն այսօր զայրացավ ՍՊԱԾ պետի վրա: Նա Ռուսաստանից նամակներ է ստացել ու վարչապետին չի հայտնել:
Սննդի անվտանգության պետական ծառայության պետը մայիսի 10-ին ու 16-ին նամակներ է ստացել Ռոսսելխոզնադզորից: Այս մասին այսօր կառավարության նիստում հայտնեց ՀՀ վարչապետ Նիկոլ Փաշինյանը:
«Ինձ համար անակնկալ էր, որ ես տեղյակ չեմ` Սննդամթերքի անվտանգության պետական ծառայության (ՍԱՊԾ) պետը ՌԴ-ից նամակներ է ստացել»,- ասաց Փաշինյանը` հարց ուղղելով ծառայության պետ Իշխան Կարապետյանին, թե ինչ են արել նամակները ստանալուց հետո:
Կարապետյանը նշեց, որ հարցը քննարկվել է ռուս գործընկերների հետ:
«Դուք ո՞ւմ եք զեկուցել, որ նման իրավիճակ կա»,- հարցրեց Փաշինյանը` հիշեցնելով, որ վարչապետի պաշտոնը ստանձնելուց հետո ինքը հետաքրքրվել է` խնդիրներ կա՞ն գյուղմթերքների արտահանման ոլորտում:
«Իմանալով, որ ես հետաքրքրված եմ այդ հարցով, դուք ինձ տեղյակ չեք պահել»,- ասաց Փաշինյանը:
ՍՊԱԾ պետը հայտնեց, որ դեպքը վերաբերել է մեկ ընկերության արտահանած ապրանքին: Ռուսական կողմից հարցը բարձրացնելուց հետո, նրա խոսքով, հսկողությունն ուժեղացվել է:
Կարապետյանը հայտնեց նաև, որ խնդիրը վերաբերել է հիմնականում մակնշմանը, սակայն Փաշինյանը նշեց, որ հայտնաբերվել են ֆիտոսանիտարական բնույթի խախտումներ:
Փաշինյանը հրահանգեց, որ կառավարության նիստում տեղի ունեցած քննարկումը որևէ կերպ չընկալվի գյուղացիների առաջ խնդիրներ առաջացնելու ենթատեքստում: «Գյուղացին պետք է առանց խոչընդոտների կարողանա արտահանել իր ապրանքը»,- ասաց նա։
Վարչապետը խոստացավ` եթե իրավիճակը կրկնվի ու ՍԱՊԾ-ը չպահպանի պահանջները, այդ քննարկումը կլինի վերջինը:
Հիշեցնենք` խոսքը վերաբերում է ՌԴ արտահանվող հայկական լոլիկում ռուսական կողմից հայտնաբերված ցեցի առկայությանը:
Աղբյուրը՝ armeniasputnik.am
