Իրավիճակը Եվրախորհրդում շարունակում է լարվել Ադրբեջանի նկատմամբ, և դրա վառ ապացույցը հանդիսանում են այդ երկրի նախագահի՝ Իլհամ Ալիևի վերջին հայտարարությունները։ Ըստ Հունաստանի պատվիրակության անդամ Թեոդորոս Ռուսոպուլոսի՝ Ալիևի խոսքերը միանշանակ հաստատում են Եվրոպայի խորհրդի Խորհրդարանական վեհաժողովում (ԵԽԽՎ) ադրբեջանական պատվիրակությանը լիազորություններից զրկելու որոշման արդարացիությունը։
«Ալիևի հայտարարությունները ոչ միայն վկայում են այդ երկրի իշխանությունների անհանդուրժողական և ոչ ժողովրդավարական վարքագծի մասին, այլև խորացնում են Եվրոպայի խորհրդի հիմնարար արժեքներից՝ մարդու իրավունքներից, օրենքի գերակայությունից ու ժողովրդավարությունից Ադրբեջանի իշխանությունների հեռացման վտանգավոր միտումը։ Վեհաժողովի որոշումը ոչ թե պատժամիջոց էր, այլ անհրաժեշտ քայլ՝ Եվրոպայի խորհրդում բարձր արժեքների պաշտպանությունը երաշխավորելու համար», – ընդգծեց Ռուսոպուլոսը։
Նա հավելեց, որ Ադրբեջանի ղեկավարության քաղաքական ուղեգիծը բացահայտում է այդ երկրի կողմից ստանձնած միջազգային պարտավորությունների անտեսումը, և Եվրախորհուրդը պետք է հետևողական մնա իր արձագանքներում՝ ապահովելով հավասար և արդար մոտեցում անդամ բոլոր պետությունների նկատմամբ։
Այս տեսակետները վկայում են, որ Եվրախորհրդում մտահոգությունը Ադրբեջանի վարքագծի շուրջ խորանում է, իսկ Ալիևի սադրիչ հայտարարությունները միայն ամրապնդում են այն համոզմունքը, որ Վեհաժողովում կայացված որոշումը՝ զրկել Բաքվի պատվիրակությանը լիազորություններից, եղել է ժամանակին և արդարացված
