Նախարար. Նախատեսում ենք Հայկական ԱԷԿ-ը շահագործել մինչեւ 2036 թվականը

Վստահաբար կարող ենք ասել, որ Հայկական ԱԷԿ-ի շահագործման ժամկետը երկարացվել է, եւ մենք նախատեսում են այն շահագործել մինչեւ 2036 թվականը։ Այս մասին նոյեմբերի 16-ին լրագրողների հետ զրույցում Հայկական ԱԷԿ կատարած այցի ժամանակ հայտարարեց ՀՀ տարածքային կառավարման եւ ենթակառուցվածքների նախարար Գնել Սանոսյանը։

Նրա խոսքով՝ դրա համար կան բոլոր նախադրյալները, բոլոր աշխատանքներն արված են:

Նա հավելեց, որ առաջիկա տարիների համար եւս աշխատանքներ են նախատեսված, որոնք կիրականացվեն ժամանակացույցին համապատասխան։

«Երկրորդ էներգաբլոկի արդիականացման աշխատանքները սկսվել են 2015 թվականին, իսկ վերանորոգման եւ ինժեներական աշխատանքները սկսվել են 2016 թվականին։ Այսօր ամփոփեցինք հնգամյա ծրագրի արդյունքները։ Այս ընթացքում էներգաբլոկը գրեթե ամբողջությամբ թարմացվել է (90 տոկոսով), այդ թվում՝ գեներատորներն եւ այլ սարքավորումները»,- ասաց նախարարը։